Downing Street ka ngritur shqetësime mbi përdorimin e mundshëm të armëve kimike nga forcat ruse në Mariupol për të arritur fitore
Qeveria britanike paralajmëroi për një përdorim të mundshëm të armëve kimike nga forcat ruse në qytetin e rrethuar ukrainas Mariupol, transmeton Anadolu Agency (AA).
Pas analizimit të operacioneve ruse në rajonet lindore të vendit dhe në veçanti në rajonin e Donetsk-ut, ku raportohet se gazi fosfor ishte përdorur nga forcat ruse, Downing Street ka ngritur shqetësime mbi përdorimin e mundshëm të armëve kimike nga forcat ruse në Mariupol për të arritur fitore.
“Përdorimi i mëparshëm i municioneve me fosfor nga forcat ruse në rajonin e Donetsk-ut rrit mundësinë e përdorimit të tyre të ardhshëm në Mariupol, ndërsa lufta për qytetin intensifikohet”, tha Ministria e Mbrojtjes në një deklaratë.
“Granatimet ruse kanë vazhduar në rajonet Donetsk dhe Luhansk, me forcat ukrainase që zmbrapsën disa sulme që rezultuan në shkatërrimin e tankeve, automjeteve dhe pajisjeve të artilerisë ruse”, shtohet në deklaratë.
Ministria e Mbrojtjes paralajmëroi gjithashtu për përdorimin e bombave të padrejtuara nga Moska që rrit ndjeshëm rrezikun e viktimave civile, ngjashëm si në qytetin Kramatorsk javën e kaluar, ku qindra civilë u vranë në një sulm me raketa në një stacion treni.
“Mbështetja e vazhdueshme e Rusisë në bomba të padrejtuara zvogëlon aftësinë e tyre për të shënjestruar kur kryejnë sulme, ndërsa rrit ndjeshëm rrezikun e viktimave të mëtejshme civile”, thuhet në deklaratë.
