Mijëra njerëz protestuan dje përpara salloneve të Teslës anembanë botës, në shenjë kundërshtimi ndaj Elon Musk-ut dhe rolit të tij në qeverinë federale amerikane me presidentin Donald Trump në krye.
Protestat u mbajtën pothuajse në të gjitha shtetet e ShBA-së, por edhe në Australi, Zelandën e Re, Kanada, Irlandë, Gjermani, Zvicër, Francë, Mbretërinë e Bashkuar dhe shumë vende të tjera evropiane.
Rreth 200 ngjarje u zhvilluan dje në mbarë botën. Në Irlandë, tema ishte “Smash the Fash” (Shkatërro fashistin), ndërsa zviceranët dolën me mesazhin “Down with Doge” (Rrëzojeni Doge), duke iu referuar të ashtuquajturit “Departamenti për Efikasitetin e Qeverisë” – DOGE, një strukturë e re federale e drejtuar nga Musk, që ka për qëllim uljen e buxhetit shtetëror.
Lëvizja me emrin “Tesla Takedown” u bën thirrje qytetarëve për tre hapa konkretë: të mos blejnë Tesla, të shesin aksionet e Teslës dhe t’u bashkohen protestave. Një nga sloganet ishte:
“Të dëmtojmë Teslën do të thotë të ndalim Musk-un. Të ndalim Musk-un do të thotë të shpëtojmë jetët dhe demokracinë.”
“Kjo nuk është një kryengritje kundër veturave elektrike, kjo është kryengritje kundër Musk-ut,” deklaruan protestuesit.
Në Nju Jork u mblodhën disa qindra persona. Organizatorja Sophie Shepherd nga grupi Planet Over Profit sqaroi:
“Këtu jemi sepse Musk po e përdor Teslën si një mjet të pushtetit politik. Ai organizoi panaire makinash në barin e Shtëpisë së Bardhë. Qëllimi ynë është të dëmtojmë biznesin e tij sa më shumë të mundemi.”
Marty (82), që kishte protestuar kundër luftës në Vietnam në vitet ’60, tha:
“Jam këtu sepse kam frikë për vendin tim. Kjo është një përpjekje për marrjen e shtetit nga një oligark.”
Në Washington u mbajt një protestë e quajtur “Tesla Takedown Dance Party” – me vallëzim, muzikë dhe mesazhe si:
“Hidhu aksionet-meme, bashkohu në kolonën e vallëzimit!”
Në Londër, protesta u mbajt përgjatë rrugës A40, përpara sallonit të Teslës. Aktivisti Nigel Warner tha se Musk “financon të djathtën ekstreme dhe frikëson republikanët që nuk pajtohen me Trump-in.”
Louise Cobbett-Witten, e cila ka familje në ShBA, tha:
“Ka shumë gjëra që po ndodhin për të qëndruar indiferentë. Edhe nëse e vetmja gjë që mund të bëjmë është të mbajmë pankarta dhe të bërtasim – edhe kjo është diçka.”
Valët e protestave dhe vandalizmit nisën që kur Musk u bashkua me Trump-in në administratën e tij dhe për shkak të qëndrimeve të tij politike kontroverse. Më pas, erdhi edhe përshëndetja e ndezur e Musk-ut natën e inaugurimit, kur ngriti dorën e djathtë para turmës së mbështetësve të Trump-it. Fillimisht reagimi ishte me protesta paqësore, por pastaj kaloi në dhunë dhe shkatërrim prone, raporton CNN.
Shitjet e Teslës pësuan kolaps në tregjet kyçe. Në Gjermani, shitjet ranë ndjeshëm – në shkurt u shitën 76% më pak makina të Musk-ut krahasuar me të njëjtën periudhë të vitit të kaluar, pavarësisht rritjes prej 31% në shitjet totale të veturave elektrike. Këto janë shifrat më të ulëta që nga viti 2021.
Në Kinë, shitjet ranë me 11.5% në krahasim me vitin e kaluar. Norvegjia, Danimarka dhe Suedia shënuan rënie prej 40%, ndërsa Franca regjistroi një rënie prej 26%.
