Përfaqësuesi i Bashkimit Evropian (BE) për Politikë të Jashtme dhe Siguri, Josep Borrell, në prag të nisjes së mbledhjes së Këshillit të Punëve të Jashtme të BE-së, ka thënë se ndonëse ekzistojnë disa pengesa në rrugën e Ballkanit Perëndimor drejt anëtarësimit në BE, hapja e negociatave për Ukrainën do të dinamizojë procesin e integrimeve evropiane të rajonit.
Shefi i diplomacisë evropiane, në një prononcim para gazetarëve të hënën, ka theksuar se ekziston një pengesë në procesin e dialogut për normalizimin e marrëdhënieve ndërmjet Kosovës dhe Serbisë, porse sipas tij, dinamika që do të krijohet pas hapjes së negociatave mes BE-së dhe Ukrainës do të ndikojë tek të vendet tjera kandidate që presin anëtarësimin.
“Komisioni Evropian ka propozuar hapjen e negociatave për Ukrainën. Kjo do të shkaktojë një ortek të vendeve të tjera që duan të anëtarësohen. Ka një pengesë në negociatat ndërmjet Serbisë dhe Kosovës, por dinamika që do të iniciojë Ukraina do të ndikojë në të gjithë vendet kandidate që aktualisht presin radhën e tyre në procesin e negociatave”, ka thënë Borrell.
