Lideri i së djathtës austriake dhe kryetari i Partisë së Lirisë së Austrisë (FPÖ), Herbert Kickl, ka paralajmëruar paraqitjen e një mocioni mosbesimi ndaj qeverisë austriake.
Seanca e Këshillit Kombëtar të Austrisë, përkatësisht dhomës së ulët të parlamentit, do të mbahet më 14 tetor. Kickl deklaroi se eksperimenti i qeverisë trepartiake ka dështuar dhe se Austria ndodhet në një bllokadë politike.
Lideri i FPÖ-së e konsideron kancelarin përgjegjësin kryesor për situatën aktuale.
“Stocker po e përforcon këtë ngërç të padurueshëm, sepse kapet edhe më dëshpërimisht pas postit të kancelarit sesa Babler pas drejtimit të partisë së tij. ÖVP-ja mbahet fort pas pushtetit, sepse e di mirë se në zgjedhjet e reja do të bëhet krejtësisht e parëndësishme. Kryesorja është të sigurohet posti i kancelarit dhe të plotësohen gjashtë poste ministrore – kjo është e vetmja mënyrë të menduari që ka mbetur në Partinë Popullore. Këtyre njerëzve nuk u intereson as vendi, as populli i tij”, tha Kickl.
Në një deklaratë për media, lideri i FPÖ-së tha se ÖVP-ja i frikësohet një kolapsi në zgjedhjet e reja dhe për këtë arsye mbahet fort pas pushtetit.
Nga akuzat nuk u kursye as SPÖ-ja. Sipas Kicklit, në vend të punës konstruktive, publiku po dëshmon një spektakël të padenjë.
“Një parti në këtë gjendje nuk mund ta drejtojë kursin e Austrisë. Ky eksperiment i koalicionit të humbësve, në dëm të republikës sonë, ka dështuar në mënyrë spektakolare dhe duhet të ndërpritet menjëherë”, tha lideri i FPÖ-së.
Ai pretendon se edhe vetë socialdemokratët e kanë kuptuar se bashkëpunimi brenda qeverisë nuk funksionon më. Sipas tij, mosmarrëveshjet e brendshme po e lënë në hije punën politike.
“Ajo që po ndodh në këtë stallë të kuqe marksiste është tallje me qytetarët. SPÖ-ja po e keqpërdor republikën tonë si një klinikë rehabilitimi për ëndërrimtarë të dështuar të së majtës dhe burokratë. Një parti në këtë gjendje nuk mund ta drejtojë kursin e Austrisë”, deklaroi Kickl.
Qeveria e Austrisë përbëhet nga koalicioni i Partisë Popullore të Austrisë (ÖVP), Partisë Socialdemokrate (SPÖ) dhe NEOS-it.
