Qeveria federale e Belgjikës, para pushimit veror, ka miratuar një sërë masash të reja, përfshirë edhe ndalimin e importit të mallrave nga territoret palestineze të pushtuara në mënyrë të paligjshme.
Kjo masë ishte propozuar fillimisht në fund të verës së kaluar, si përgjigje ndaj fushatës së intensifikuar ushtarake të Izraelit në Gaza, por për një kohë të gjatë kishte mbetur e bllokuar për shkak të ngërçit politik.
Megjithatë, nga e premtja deri të shtunën në mëngjes, kabineti miratoi rreth 88 dosje, përfshirë reformën me të cilën përllogaritja e orëve të punës ndryshon nga niveli vjetor në atë javor, si dhe masat e përmendura tregtare.
Ky vendim vjen në një kohë kur një koalicion qeverish të vendeve anëtare të Bashkimit Evropian po kërkon vendosjen e sanksioneve për shkak të veprimeve të Izraelit në territoret e pushtuara palestineze.
Organi ekzekutiv i BE-së, Komisioni Evropian, së fundmi u ka dërguar kryeqyteteve të vendeve anëtare një dokument ku propozohen disa alternativa, përfshirë një sistem lejesh për importin e mallrave nga vendbanimet, vendosjen e tarifave, si dhe ndalimin e plotë të importeve.
Franca, Belgjika, Irlanda, Holanda dhe Spanja ishin ndër vendet që mbështesin ndalimin e plotë të importeve, ndërsa Gjermania dhe Italia ishin kundër. Nëse kjo masë vlerësohet si vendim i politikës së jashtme dhe jo tregtar, për miratimin e saj do të nevojitet mbështetja unanime e të gjitha shteteve anëtare.
Më herët gjatë kësaj jave, ministri belg i Punëve të Jashtme, Maxime Prévot, kritikoi ashpër Bashkimin Evropian dhe qeveritë e tjera për zvarritjen e vendosjes së masave më të rrepta.
“Komisioni më në fund vendosi disa alternativa në tryezë, dhe atë vetëm në dy faqe. Kjo krijon përshtypjen se kemi të bëjmë më shumë me një gjest simbolik sesa me një synim të vërtetë për të arritur përparim”, u tha ai gazetarëve të hënën.
