Kryeministri izraelit Benjamin Netanyahu dhe presidenti amerikan Donald Trump diskutuan javën e kaluar mundësinë e një operacioni të ri të madh ushtarak kundër Iranit para zgjedhjeve në të dyja vendet, shkruan Axios.
Gjatë bisedës, Netanyahu shprehu shqetësim lidhur me të dhënat e inteligjencës që sugjerojnë se Irani po ndërmerr hapa për rikthimin e programit të tij bërthamor. Sipas Axios, biseda u zhvillua para se Trump të deklaronte publikisht se nuk do ta sulmonte Iranin para zgjedhjeve për Kongresin.
Burimet e Axios pretendojnë se ushtritë izraelite dhe amerikane vazhdojnë të jenë në gatishmëri dhe po përfundojnë përgatitjet në rast se Trump ndryshon qëndrim. Një zyrtar amerikan tha se Trump nuk ka marrë asnjë zotim dhe se mesazhi që Izraeli të përgatitet do të thotë: “ndoshta tani, ndoshta më vonë, ndoshta kurrë”.
Raportohet gjithashtu se Trump fillimisht dukej i prirur për vazhdimin e sulmeve, por më pas u tregua më i përmbajtur. Sipas Axios, mbështetësit më të fuqishëm të goditjeve të reja janë sekretari amerikan i Mbrojtjes, Pete Hegseth, dhe komanda e CENTCOM-it, ndërsa shumica e këshilltarëve të Trumpit mendojnë se duhet të vazhdohet me sanksionet ekonomike dhe presionin ndaj Iranit.
Shefi i Shtabit të Përgjithshëm të ushtrisë izraelite, Eyal Zamir, javën e kaluar, sipas një burimi të njohur me bisedën, diskutoi me kryetarin e Shefave të Bashkuar të Shtabit të SHBA-së, Dan Caine, për mundësinë e rifillimit të luftimeve gjatë tri javëve të ardhshme. Sipas Axios, Zamir paralajmëroi se një zhvillim i tillë mund të çonte në shtyrjen e zgjedhjeve në Izrael.
Një zyrtar amerikan tha për Axios se Netanyahu e sheh fuqinë e tij politike në rolin e një kryeministri të kohës së luftës.
Nga ana tjetër, një burim izraelit pretendon se Netanyahu u ka thënë drejtuesve të tij të sigurisë se ishte Trump ai që e kishte hapur i pari temën e një sulmi të mundshëm.
Për Trumpin, një luftë e re para zgjedhjeve mund të ishte politikisht e rrezikshme, pasi do t’ua kujtonte votuesve një konflikt jopopullor dhe mund të çonte në rritjen e çmimeve të karburanteve.
