Ajo identifikoi si shkakun kryesor të ngërçit një mosmarrëveshje të rrënjosur thellë lidhur me atë se kush do të drejtojë Komitetin e Sanksioneve 1737 për Iranin dhe rikthimin e mundshëm të sanksioneve ndaj Teheranit
Këshilli i Sigurimit i OKB-së, paralajmëroi një zyrtare e lartë gjatë një debati mbi metodat e punës së këtij organi, aktualisht po përballet me ngërçin institucional më të gjatë në historinë e tij moderne, transmeton Anadolu.
“Në vitin 2026, ende nuk ka marrëveshje. Kjo tani është periudha më e gjatë pa kryetarë dhe nënkryetarë të dakorduar që nga fillimi i kësaj praktike në vitin 1979”, tha Shamala Kandiah Thompson, drejtoreshë ekzekutive e Raportit të Këshillit të Sigurimit (SCR).
Në një takim mbi metodat e punës, ajo identifikoi si shkakun kryesor të ngërçit një mosmarrëveshje të rrënjosur thellë lidhur me atë se kush do të drejtojë Komitetin e Sanksioneve 1737 për Iranin dhe rikthimin e mundshëm të sanksioneve ndaj Teheranit përmes mekanizmit të quajtur “snapback”.
Thompson shpjegoi se kjo paralizë ka pasoja të rënda praktike, duke theksuar se komitete të shumta të sanksioneve dhe grupe pune nuk po funksionojnë më me kapacitet të plotë.
Për shembull, tha ajo, Grupi i Punës për Fëmijët dhe Konfliktet e Armatosura ka grumbulluar një numër të konsiderueshëm raportesh të prapambetura për vende të ndryshme, sepse mbetet i paaftë të miratojë përfundime zyrtare.
Thompson propozoi “shkëputjen” e emërimeve për të cilat nuk ka kundërshtime nga ato të kontestuara, me qëllim rikthimin e funksionalitetit bazë të sistemit.
Thompson gjithashtu theksoi se ngërçi aktual nuk po ndikon vetëm në punën e këtij viti, por ai po pengon edhe anëtarët e sapozgjedhur që të fillojnë punën e tyre për vitin e ardhshëm.
Informimi shqyrtoi gjithashtu procesin në vazhdim për përzgjedhjen e sekretarit të ardhshëm të përgjithshëm. Teksa transparenca është rritur që nga viti 2016, Thompson ngriti shqetësime lidhur me fshehtësinë e vazhdueshme të sondazheve paraprake.
Ajo argumentoi se publikimi zyrtar i rezultateve të sondazheve do të ofronte siguri më të madhe lidhur me saktësinë e tyre.
Ajo tha se renditja e përcaktuar për kandidatët nuk u respektua në ciklin aktual. Një kandidat, sipas saj, është përfshirë në sondazhet paraprake pa kaluar të njëjtin nivel angazhimi me Asamblenë e Përgjithshme dhe Këshillin e Sigurimit.
– Ringjallja e diplomacisë parandaluese
Thompson i bëri thirrje Këshillit të Sigurimit që të kalojë nga masat reaguese drejt mekanizmave proaktivë të “paralajmërimit të hershëm”.
Ajo theksoi se sekretari i përgjithshëm duhet të ofrojë jo vetëm informacion, por edhe “opsione konkrete për veprim përballë një krize të pashmangshme”. Ajo sugjeroi që raportet e ardhshme të sekretarit të përgjithshëm të OKB-së të përfshijnë seksione të veçanta kushtuar paralajmërimit të anëtarëve për përkeqësimin e situatave.
Zyrtarja theksoi gjithashtu rënien dramatike të përdorimit të misioneve vizituese nga Këshilli i Sigurimit. Derisa organi zakonisht zhvillonte deri në pesë misione në vit para vitit 2020, vetëm katër janë zhvilluar gjatë gjashtë viteve të fundit.
Thompson bëri thirrje për ringjalljen e këtyre misioneve për të vlerësuar më mirë nëse mandatet kanë nevojë për rishikim ose nëse misionet mund të reduktohen në mënyrë të sigurt.
“Derisa metodat e punës nuk mund t’i zgjidhin dallimet politike, ato janë thelbësore për t’i ndihmuar anëtarët të përballojnë këto dallime”, tha zyrtarja.
