Zyrtari i lartë i Hamasit, Ghazi Hamad, u shfaq të mërkurën në një intervistë televizive, paraqitja e tij e parë publike pas sulmit izraelit të javës së kaluar të drejtuar ndaj udhëheqësve të grupit në Doha.
Në intervistën për rrjetin Al-Jazeera, Hamad konfirmoi se ndodhej në vendin e sulmit kur ndodhi shpërthimi. Shfaqja e tij ishte dëshmia e fundit se sulmi izraelit nuk arriti të vriste udhëheqjen e grupit.
“Po diskutonim për propozimin e armëpushimit, dhe më pak se një orë pas fillimit të takimit dëgjuam një shpërthim. Jemi të stërvitur në zërat e raketave dhe kuptuam se bëhej fjalë për një sulm izraelit. E lamë menjëherë vendin dhe falë Zotit që mbijetuam. Zoti caktoi që të shpëtonim nga kjo agresion i pabesë kundër nesh dhe Katarit vëllazëror,” tha Hamad.
Gjashtë persona, përfshirë një oficer nga Katari, u vranë në sulm, por besohet se të gjithë udhëheqësit e lartë të grupit mbijetuan. Katari ka qenë nikoqir i udhëheqjes politike të Hamasit që nga viti 2012.
Përpjekja izraelite për të vrarë liderët politikë të Hamasit më 9 shtator shkaktoi dënime ndërkombëtare, por kryeministri Benjamin Netanyahu paralajmëroi Katarin që ose t’i dëbojë zyrtarët e Hamasit ose t’i “sjellë para drejtësisë, sepse nëse ju nuk e bëni, do ta bëjmë ne”.
Hamad i tha gjithashtu Al Jazeera-s të mërkurën se Washingtonit i mungon besueshmëria si ndërmjetës për një marrëveshje armëpushimi, duke përmendur atë që e quajti përvoja “e hidhur” e grupit me përpjekjet për ndërmjetësim.
Si përgjigje ndaj paralajmërimit të Trumpit se do të ketë “ferr për t’u paguar” nëse Hamasi përdor pengjet si mburoja njerëzore, Hamad tha se presidenti amerikan “nuk na frikëson” dhe pohoi se pengjet mbahen në përputhje me “bindjet dhe parimet islame”.
“Ne sillemi me pengjet në përputhje me vlerat tona, dhe pavarësisht masakrave mbi popullin tonë, ajo që i rrezikon ata është vetë pushtimi izraelit,” shtoi Hamad.
