Sindikatat kërkojnë “rekrutim masiv” dhe rritje të fondeve, ndërsa Franca po përballet me sezon të rëndë të zjarreve
Zjarrfikësit francezë nisën një grevë në shkallë të gjerë për shkak të mungesës së personelit dhe pajisjeve, duke kërkuar rritje të financimit dhe rekrutim të mëtejshëm, raportoi BFMTV, transmeton Anadolu.
Përfaqësuesit e nëntë sindikatave të zjarrfikësve dhe personelit të specializuar mbajtën një konferencë për media para Ministrisë së Brendshme, duke thënë se “burimet nuk po ecin në hap me nevojat” dhe duke kërkuar “rekrutim masiv”.
Xavier Boy, zëdhënës i grupimit ndërsindikal, njoftoi një “mobilizim intensiv, me siguri më i madhi në përmasa që profesioni i zjarrfikësit ka parë ndonjëherë”, dhe bëri thirrje për protestë në Paris më 29 shtator.
Në një deklaratë të lëshuar më 7 gusht, me të cilën njoftuan grevën, nëntë sindikatat përmendën “vështirësi të mëdha”, përfshirë “mungesën kronike të personelit” dhe “mungesën e theksuar të pajisjeve”.
Ata kërkuan “financim të qëndrueshëm, të drejtë dhe ambicioz”, “rekrutim masiv” të zjarrfikësve profesionistë, si dhe të personelit administrativ, teknik dhe të specializuar, krahas “një përparësie të vërtetë kombëtare për shëndetin dhe sigurinë e personelit”.
Greva zhvillohet në një kohë kur Franca po përballet me një sezon të rëndë të zjarreve pyjore. Ministri i Brendshëm Laurent Nunez tha më 26 korrik se që nga fillimi i vitit 2026 janë djegur 115.000 hektarë sipërfaqe, përfshirë 42.000 hektarë nga zjarret në departamentin Gironde në jugperëndim të vendit.
