Kryeministri i Kosovës në detyrë, Albin Kurti është deklaruar sot shkurtimisht në lidhje me vendimin për mandatarin.
Ai ka thënë para mediave se ky vendim pritet të merret në fundjavë.
Vendimi i tyre për mandatarin pritet të vije pasi kryetari i zgjedhur i Kuvendit të Kosovës, Dimal Basha ka konsideruar se Kuvendi i Kosovës është konstituuar, duke i hapur kështu rrugë formimit të Qeverisë.
Kuvendi i Kosovës ka zgjedhur kryetarin dhe katër nënkryetarët e Kuvendit, tre nga partitë shqiptare dhe një nga minoritetet joserbe, ndërkaq nënkryetari i pestë, nga minoriteti serb mbetet i pavotuar.
Deputetët e opozitës nuk kanë votuar pro asnjë deputeti të Listës Serbe dhe as Nenad Rashiqit, pasi sipas tyre nënkryetarët nga minoritetet duhet të votohen në pako dhe jo të ndarë e që sipas tyre ky veprim është jokushtetues.
Deputetët e VV-së kanë votuar kundër 9 deputetëve të Listës serbe, nga tri herë duke i “djegur” të gjithë ata si dhe Nenad Rashiqin.
Kryetari i Kuvendit, Dimal Basha dhe deputetët e VV-së kanë bërë thirrje në vazhdimësi për ta votuar Nenad Rashiqin, i cili sipas tyre është deputet serb i cili e njeh Republikën e Kosovës por që as ai nuk është votuar për tri herë sa është vënë në votim.
Ndërkombëtarët, partitë opozitare, Presidentja Osmani, dhe vetë Nenad Rashiq e kanë konsideruar Kuvendin e Kosovës ende të pakonstituuar, duke deklaruar se nuk mund të vazhdohet me formimin e Qeverisë, por që sipas VV-së, Kuvendi është i konstituuar me katër nënkryetarë dhe kryetarin.
Lista Serbe e ka dërguar si ankesë në Gjykatën Kushtetuese të Kosovës, çështjen e zgjedhjes së nënkryetarit nga komuniteti serb.
Në njoftimin e tyre thuhet se presin nga Kushtetuesja të reagojë dhe të marrë masat e nevojshme.“
Ata Kuvendit të Kosovës i referohen si ‘Kuvendi në Prishtinë”.
“Anëtarët e Listës Serbe dorëzuan sot një ankesë në Gjykatën Kushtetuese për shkeljen e rëndë të të drejtave të popullit serb në seancat e Kuvendit në Prishtinë. Parimet kushtetuese dhe demokratike janë shkelur rëndë, dhe populli serb nuk është në gjendje t’i ushtrojë të drejtat e garantuara. Ne presim që Gjykata Kushtetuese të reagojë urgjentisht dhe të marrë të gjitha masat e nevojshme për të mbrojtur sundimin e ligjit, si dhe të drejtat e popullit serb në përputhje me aktet ligjore në fuqi”, thuhet në njoftimin e tyre.
