Edhe pse Hanin mbijetoi, ajo ka pësuar djegie të rënda të shkallës së dytë dhe të tretë në fytyrë, krahë dhe këmbë, dhe sytë e saj janë të ënjtur
Vajza 6-vjeçare palestineze Hanin al-Wadiye nga Gaza, humbi familjen e saj dhe pësoi djegie të rënda në një sulm ajror nga ushtria izraelite në shkollën “Fahmi al-Jarjawi”, në të cilën po strehoheshin palestinezët e zhvendosur, raporton Anadolu.
Kjo shkolle u bë varr për familjen e cila u strehua duke menduar se ajo ishte “e sigurt”. Vetëm Hanin i mbijetoi sulmit në të cilin humbën jetën 31 persona, përfshirë 18 fëmijë dhe 6 gra.
Edhe pse Hanin mbijetoi, ajo ka pësuar djegie të rënda të shkallës së dytë dhe të tretë në fytyrë, krahë dhe këmbë, dhe sytë e saj janë të ënjtur. Në mediat sociale u shfaqën video të 6 vjeçares, e cila ndodhet në shtratin e spitalit për trajtim me fytyrën e saj të djegur dhe jashtëzakonisht të ënjtur, duke u përpjekur të shpjegojë incidentin.
Duke treguar se në ndërtesë shpërtheu një zjarr, Hanin shpjegoi duke marrë frymë dhe e frikësuar momentet e tmerrshme që kishte përjetuar. “Zjarri ishte i madh. Isha mbështjellë me një batanije, sepse kishte zjarr pranë meje. Dola nga poshtë batanijes dhe fillova të kërkoja nënën dhe babanë tim, por nuk munda t’i gjeja. Pastaj dëgjova zërin e nënës sime, por nuk e dija se ku ishte. Vrapova jashtë duke bërtitur: ‘Mami, mami'”, tha ajo.
– Krejtësisht vetëm dhe e plagosur
Hanin ka mbetur e vetme edhe me peshën e rëndë të plagëve të saj fizike por edhe me faktin se ajo ka mbetur krejtësisht vetëm.
Xhaxhai i Haninit, Ahmed al-Wadiye, i cili është mjek, u kujdes për mbesën e tij i cila ka mbetur jetime dhe që është e plagosur rëndë pas sulmit.
Në videot që qarkullojnë në mediat sociale, Ahmedi tha se familja e Haninit ishte strehuar në shkollën “Fahmi al-Jarjawi” duke ardhur nga lagjja Shuyaiyya për shkak të kërcënimeve izraelite për dëbim. Ai thotë se nuk ka vend të sigurt në Gaza, përfshirë shkollat dhe spitalet dhe se po shkelet i gjithë ligji ndërkombëtar.
Xhaxhai Ahmedi tregoi se Hanin humbi prindërit, motrën dhe xhaxhallarët e saj, ndërsa ka parë familjen e saj të digjet nga zjarri.
– Sulmet e Izraelit në zonat nën mbrojtjen e ligjit ndërkombëtar
Ushtria izraelite vazhdon të shënjestrojë drejtpërdrejt strehimoret civile në Gaza me sulme që shkelin ligjet e luftës. Shkolla “Fahmi al-Jarjawi” ishte një nga të ashtuquajturat strehë të sigurta për familjet që kishin shpëtuar nga bombardimet shumë herë më parë.
Shumë herë janë shënjestruar shkollat, spitalet, qendrat e refugjatëve dhe zonat e banimit që duhet të mbrohen sipas ligjit ndërkombëtar.
Pamjet e sulmit ajror të ushtrisë izraelite në shkollën “Fahmi al-Jarjawi”, ku palestinezët e zhvendosur po strehoheshin, treguan tenda të djegura rreth shkollës, shumë fëmijë të vrarë ose të plagosur dhe civilë që përpiqeshin t’u shpëtonin flakëve.
