Avionët luftarakë sudanezë shënjestruan pozicionet paraushtarake të RSF-së në të dy shtetet pasi ushtria zgjeroi ofensivën ajrore për të çmontuar strukturën luftarake të grupit rebel
Ushtria sudaneze ka nisur sulme ajrore ndaj pozicioneve të Forcave të Mbështetjes së Shpejtë (RSF) në shtetet Darfuri Qendror dhe Kordofani i Veriut, mes përshkallëzimit të luftimeve në vendin e shkatërruar nga lufta, transmeton Anadolu.
Portali i lajmeve Al-Mashad Al-Sudani raportoi se avionët luftarakë sudanezë shënjestruan pozicionet paraushtarake të RSF-së në të dy shtetet pasi ushtria zgjeroi ofensivën ajrore për të çmontuar strukturën luftarake të grupit rebel.
Ditëve të fundit, ushtria sudaneze intensifikoi sulmet e saj tokësore dhe ajrore në një përpjekje për të dëbuar forcat e RSF-së nga zonat që ata pushtuan së fundmi.
Dje, kryetari i Këshillit të Sovranitetit Kalimtar të Sudanit, Abdel Fattah al-Burhan, pohoi angazhimin e ushtrisë për të eliminuar RSF-në dhe për t’u hakmarrë për gjakderdhjen civile nga grupi rebel në qytetin El-Fasher dhe qytete të tjera.
Grupi paraushtarak dje pretendoi se disa sulme me dronë u nisën nga “një bazë e huaj” që shënjestruan qytetin Zalingei në Darfurin Qendror dhe qytetin Kabkabiya në Darfurin e Veriut.
Në fund të muajit tetor, grupi pretendoi se kishte pushtuar qytetin Barah në Kordofanin e Veriut, duke detyruar më shumë se 4.500 banorë të ikin mes raporteve për abuzime të përhapura. Qyteti ndodhet pranë El-Obeidit, kryeqytetit strategjik të rajonit, tani i kontrolluar nga ushtria, por gjithnjë e më shumë i rrethuar nga RSF-ja.
Nga 18 shtetet e Sudanit, RSF-ja aktualisht kontrollon të pesë shtetet e rajonit të Darfurit në perëndim, përveç disa zonave veriore në Darfurin e Veriut. Ushtria sudaneze ka kontrollin mbi shumicën e 13 shteteve të mbetura në rajonet jugore, veriore, lindore dhe qendrore, përfshirë kryeqytetin Khartum.
Që nga 15 prilli i vitit 2023, ushtria sudaneze dhe RSF-ja janë përfshirë në një luftë që ndërmjetësimet rajonale dhe ndërkombëtare nuk kanë arritur ta përfundojnë. Konflikti ka vrarë mijëra njerëz dhe ka zhvendosur miliona të tjerë.
