Një ushtar izraelit, i cili po kryente shërbimin e detyrueshëm ushtarak, është dënuar me pesë vjet burg për kryerjen e detyrave të spiunazhit në favor të Iranit, njoftoi ushtria izraelite.
Ushtari u shpall fajtor për kontakt me një agjent të një shteti të huaj dhe për transmetimin e informacioneve që mund t’i shërbenin armikut, pas një hetimi të përbashkët nga policia ushtarake, policia izraelite dhe shërbimi i sigurisë Shin Bet.
Forcat e Mbrojtjes së Izraelit (IDF) bënë të ditur se gjatë vitit 2025 ushtari kishte marrë mesazhe përmes aplikacionit Telegram nga disa persona, disa prej të cilëve u identifikuan si të lidhur me Iranin dhe i ofronin punë të ndryshme. Një operativ iranian i kishte ofruar para në këmbim të “detyrave të ndryshme fotografike”.
Sipas rezultateve të hetimit, ushtari i dërgoi operativit iranian dy video të kapjes së raketave, të cilat i kishte regjistruar në zona civile dhe jo në baza ushtarake, gjatë luftës ndërmjet Izraelit dhe Iranit në qershor të vitit 2025. Për njërën nga këto video ai mori kompensim financiar.
Përveç kësaj, ai dërgoi edhe disa video nga zona civile, përfshirë një video që tregonte vendin e goditjes së një rakete dhe të cilën e kishte gjetur në internet.
“Në fund, pasi ndjeu presion, i akuzuari e njoftoi një pjesëtar të njësisë së tij se kishte qenë në kontakt me një agjent të huaj, pas së cilës u arrestua të nesërmen nga Shin Bet”, deklaroi ushtria izraelite.
Prokurorët ushtarakë kërkuan një dënim prej shtatë vjetësh burg, së bashku me sanksione shtesë, duke theksuar peshën dhe rrezikshmërinë e veprimeve të tij, si dhe nevojën për ta parandaluar atë dhe të tjerët nga kryerja e veprave të ngjashme.
Megjithatë, gjykata ushtarake mori parasysh në vendim faktin se ushtari nuk kishte transmetuar informacione ushtarake dhe as të dhëna të siguruara gjatë kryerjes së detyrës në IDF. Si rrethanë lehtësuese u vlerësua gjithashtu fakti se ai e kishte ndërprerë kontaktin me operativin iranian dhe e kishte raportuar rastin te eprorët e tij.
Për këtë arsye, gjykata e dënoi me pesë vjet burg, dënim me kusht, gjobë prej 1.000 shekelësh izraelitë (NIS), si dhe ulje në gradën e ushtarit, gradën më të ulët në ushtrinë izraelite.
Identiteti i ushtarit të dënuar dhe njësia në të cilën ai shërbente vazhdojnë të jenë nën ndalim publikimi.
