Presidenti i Shteteve të Bashkuara të Amerikës, Donald Trump, talli ushtrinë e Venezuelës në një postim në rrjetin e tij Truth Social.
Trump publikoi një video në të cilën shihet një grua obezë duke vrapuar me vështirësi me pushkë në duar gjatë një stërvitjeje të ushtrisë venezuelase.
“Sekret i madh. I kapëm milicët venezuelas në stërvitje. Një kërcënim shumë serioz”, shkroi me sarkazëm presidenti i SHBA-së.
Ndërkohë, presidenti i Venezuelës, Nicolas Maduro, javën e kaluar deklaroi se ushtria kishte filluar trajnimin e civilëve për përdorimin e armëve në rast të një sulmi amerikan. Ai u bëri thirrje bujqve venezuelas që të jenë gati dhe, nëse është e nevojshme, të armatosen masivisht.
“Populli i Venezuelës i thotë perandorisë: Mjaft me kërcënimet”, tha Maduro në një tubim me bujq.
Rritja e tensioneve
Tensionet mes Venezuelës dhe SHBA-ve janë rritur javët e fundit për shkak të vendimit të Trumpit për të nisur sulme mbi anijet venezuelase, me arsyetimin se bëhej fjalë për një operacion kundër trafikantëve të drogës.
Trump të shtunën i kërcënoi autoritetet venezuelase duke thënë se dëshironte “që Venezuela të pranojë menjëherë të gjithë të burgosurit dhe personat nga institucionet mendore, përfshirë edhe çmendinat më të këqija në botë, të cilët ‘udhëheqja’ venezuelase i ka dëbuar drejt Shteteve të Bashkuara”.
“Mijëra njerëz janë lënduar rëndë, madje edhe vrarë, nga këto përbindësha. Nxirrini jashtë vendit tonë, menjëherë, përndryshe çmimi që do të paguani do të jetë i paçmueshëm”, shtoi ai.
Nga Shtëpia e Bardhë u tha se Trumpi është “i gatshëm të përdorë çdo element të fuqisë amerikane për të ndaluar hyrjen e drogës në vendin tonë dhe për t’i sjellë fajtorët para drejtësisë”.
“Reagjimi i Maduros nuk është një qeveri legjitime e Venezuelës, por një kartel narkoterrorist, dhe Maduro nuk është president legjitim. Ai është një udhëheqës në arrati i këtij karteli, i cili në SHBA është i akuzuar për kontrabandë të drogës në vend”, shtuan nga Shtëpia e Bardhë.
