Presidenti amerikan Donald Trump deklaroi se Izraeli ka humbur “kontrollin e plotë” mbi Kongresin, një ndryshim që ai e përshkroi si “të pabesueshëm”.
Në një intervistë për median e djathtë Daily Caller, Trumpit iu drejtua pyetja mbi qëndrimet e tij lidhur me rënien e mbështetjes republikane për Izraelin. Ai tha se Izraeli kishte lobin më të fuqishëm në Kongres që kishte parë ndonjëherë dhe se është i befasuar sesi fuqia e tij është dobësuar.
“Izraeli kishte lobin më të fuqishëm në Kongres, më të madh se çdo gjë, çdo organ, kompani apo shtet që kam parë ndonjëherë. Sot nuk është më kaq i fortë. Është e pabesueshme. Ata kishin kontroll të plotë mbi Kongresin, e tani nuk e kanë. Jam pak i befasuar kur e shoh këtë,” tha Trump.
Administrata e Trumpit haptazi mbështeti Izraelin dhe bëri pak ose aspak për të ndaluar gjenocidin e tij të vazhdueshëm në Gaza.
Megjithatë, një numër gjithnjë e më i madh republikanësh, përfshirë mbështetës të Trumpit, janë bërë kritikë ndaj mbështetjes së pakushtëzuar amerikane për ofensivën izraelite në enklavë.
Politikanë të ekstremit të djathtë si Marjorie Taylor-Green dhe komentatorë si Tucker Carlson kanë argumentuar se dështimi për të justifikuar shpenzimet amerikane për Izraelin ka minuar politikën e shumëpërfolur të Trumpit “Amerika në radhë të parë”.
Një sondazh i ri i publikuar javën e kaluar nga Universiteti Quinnipiac tregoi se shumica dërrmuese e amerikanëve nuk e miratojnë dërgimin e ndihmës ushtarake për Izraelin.
🔹 60% e amerikanëve janë kundër dërgimit të armëve Izraelit, ndërsa vetëm 32% e mbështesin ndihmën shtesë.
🔹 75% e demokratëve janë kundër ndihmës ushtarake.
🔹 66% e të pavarurve gjithashtu e kundërshtojnë.
🔹 Tek republikanët, 56% e mbështesin ndihmën dhe 36% janë kundër, megjithatë të rinjtë republikanë po distancohen nga Izraeli.
Një element domethënës është se rënia e mbështetjes për Izraelin në SHBA është shoqëruar me rritje të simpatisë për palestinezët. Në pyetjen se ku qëndrojnë simpatitë e tyre:
- 37% e votuesve amerikanë thanë me palestinezët,
- 36% me izraelitët,
- ndërsa 27% thanë se nuk kanë një opinion.
