Presidenti i Shteteve të Bashkuara, Donald Trump, do të mbajë një takim në Pentagon me ministrin e mbrojtjes, Pete Hegseth, dhe disa gjeneralë të ushtrisë amerikane, me temën e një lufte të mundshme me Kinën.
Sipas Reuters, Hegseth dhe gjeneralët do të paraqesin një prezantim për Trump-in që do të ilustrojë se si do të dukej një konflikt ndërmjet SHBA-së dhe Kinës.
Megjithëse Trump ka deklaruar se “Kina nuk do të përmendet”, dhe Hegseth ka thënë se tema e takimit do të jetë “inovacionet”, disa zyrtarë amerikanë kanë pohuar se arsyeja e vetme për këtë takim është pikërisht përgatitja për një përplasje të mundshme me Kinën.
Trump gjithashtu mohoi raportimin e New York Post se miliarderi Elon Musk, bashkëpunëtor i afërt i tij, do të marrë pjesë në këtë takim. Reuters zbulon se në takim do të jenë të pranishëm vetëm personat më të rëndësishëm të ushtrisë amerikane.
Mediat amerikane kujtojnë se SHBA-ja dhe Kina ndodhen në një “konflikt të heshtur” prej vitesh, për çështje si Tajvani, TikTok-u, Hong Kongu, COVID-19 dhe shkeljet e të drejtave të njeriut nga Partia Komuniste Kineze.
Megjithatë, Reuters, duke cituar zyrtarë amerikanë, thekson se ky takim nuk nënkupton domosdoshmërisht shpërthimin e një konflikti të hapur mes SHBA-së dhe Kinës, por është një paraqitje e planit të Pentagonit në rast se një konflikt i tillë ndodh në të ardhmen.
