Një shtetase amerikane, e cila ishte ndaluar në Iran që nga viti 2024, është liruar, njoftuan veçmas të mërkurën në mbrëmje presidenti Donald Trump dhe avokati i saj.
“Irani i ka mundësuar shtetases amerikane, e cila ishte ndaluar padrejtësisht në dhjetor të vitit 2024 gjatë ‘presidencës’ së Joe Bidenit të përgjumur, që të largohet nga vendi. Ajo tani ndodhet e sigurt jashtë Iranit dhe është në gjendje të mirë shëndetësore. Shtetet e Bashkuara të Amerikës e vlerësojnë këtë gjest vullnetmirë të Iranit!”, shkroi Trump në Truth Social, pa e bërë të ditur identitetin e saj.
Trump, i cili lirimin e përshkroi si një “gjest vullnetmirë të Iranit”, ditët e fundit ka shtuar presionin ndaj Teheranit dhe ka miratuar disa valë të reja sulmesh amerikane.
Jared Genser, avokat i të drejtave të njeriut që ka punuar në disa raste të shtetasve amerikanë të ndaluar në Iran, bëri të ditur se personi i liruar është klientja e tij, Dena Karari.
“Me kënaqësi të madhe mund të njoftoj se klientja ime, shtetasja amerikane Dena Karari, e cila që nga dhjetori i vitit 2024 ishte e bllokuar në Iran mbi bazën e akuzave të rreme, tani është e lirë”, shkroi Genser në platformën X.
“Kjo nuk do të kishte ndodhur pa përpjekjet e jashtëzakonshme dhe të palodhshme të presidentit Donald Trump. Dena tani është e sigurt dhe po kthehet në Shtetet e Bashkuara”, shtoi ai.
Në një deklaratë me më shumë hollësi, Genser tha se Kararit i ishte vendosur një ndalim i detyruar për t’u larguar nga vendi, por se ajo nuk ishte mbajtur asnjëherë fizikisht në paraburgim. Sipas tij, Ministria iraniane e Inteligjencës e kishte marrë në pyetje dhjetëra herë për shkak të punës së saj në organizatën jofitimprurëse Children of Mehr Foundation.
Sipas Genserit, kjo fondatë u ofronte ndihmë fëmijëve të varfër në Iran, me mbështetjen e donatorëve privatë dhe në bazë të një lejeje të Zyrës për Kontrollin e Pasurive të Huaja, OFAC, pranë Departamentit amerikan të Thesarit.
Genser i bëri gjithashtu thirrje Iranit që t’i hedhë poshtë akuzat ndaj shtetasve iranianë që kishin punuar në nivel lokal për këtë fondatë.
Sipas të dhënave të disponueshme, në Iran ndodhen aktualisht edhe të paktën pesë shtetas amerikanë të ndaluar, përfshirë Reza Valizadeh dhe Kamran Hekmati, të cilët Departamenti amerikan i Shtetit i ka cilësuar publikisht si të ndaluar padrejtësisht.
