Në qytetin Hanau të Gjermanisë, autorë të panjohur kanë vizatuar svastika naziste me gjak njerëzor në automjete dhe mure shtëpish, duke shkaktuar tronditje të madhe në opinionin publik. Sipas raportimeve të policisë, motivet e këtij akti mbeten ende të paqarta.
Ngjarja ndodhi në rrethin Lamboy, ku një banor njoftoi policinë pasi kishte vërejtur një substancë të kuqërremtë në kapakun e makinës së tij, e cila ishte formuar në simbolin e svastikës. Hetuesit më pas zbuluan dhjetëra automjete, kuti postare dhe mure banesash të dëmtuara në të njëjtën mënyrë.
Deri tani, janë regjistruar afro 50 makina të mbuluara me simbolin e ndaluar nazist. Testet paraprake kanë treguar se substanca është me shumë gjasë gjak njerëzor, megjithatë origjina e tij ende nuk është përcaktuar. Policia theksoi se nuk ka shenja dëmtimesh trupore të lidhura me incidentin.
Autoritetet po hetojnë dëmtimin e pronës dhe përdorimin e simboleve të organizatave antikushtetuese, ndërkohë që kanë bërë thirrje për informacione nga qytetarët që mund të ndihmojnë në zbardhjen e rastit.
Policia gjermane e cilëson incidentin si “akt të pazakontë dhe të frikshëm”, ndërsa opinioni publik në Hanau kujton ende sulmin racist të vitit 2020, kur në këtë qytet u vranë nëntë persona me prejardhje migrante.
