Një këshilltar i lartë i presidentit të zgjedhur Donald Trump ka thënë se administrata e ardhshme do të përqendrohet në arritjen e paqes në luftën në Ukrainë, në vend që të përpiqet të rikthejë territoret e humbura në agresionin e Rusisë ndaj Ukrainës, transmeton Gazeta Metro.
Bryan Lanza, një strateg i Partisë Republikane, i tha BBC-së se administrata Trump do të kërkojë nga presidenti ukrainas Volodymyr Zelensky versionin e tij të një “vizioni realist për paqen”.
“Po, dhe nëse presidenti Zelensky vjen në tavolinë dhe thotë se mund të kemi paqe vetëm nëse kemi Krimenë, ai tregon se nuk është serioz,” tha ai.
Rusia aneksoi gadishullin e Krimesë në vitin 2014. Tetë vjet më pas, ajo nisi një pushtim të plotë të Ukrainës dhe ka pushtuar territore në lindje të vendit.Trump ka biseduar tashmë me Zelensky që kur fitoi zgjedhjet në SHBA – dyshja pati një bisedë telefonike të mërkurën, në të cilën mori pjesë edhe miliarderi Elon Musk. “Ishte një bisedë e shkurtër me Musk, por ishte një bisedë e gjatë dhe e ngrohtë me Trump, e cila zgjati rreth një gjysmë ore,” tha një burim nga zyra e presidentit të Ukrainës për BBC-në.“Nuk ishte një bisedë për të diskutuar çështje shumë të rëndësishme, por gjithsesi ishte shumë e ngrohtë dhe e këndshme.”
Trump ka thënë vazhdimisht se prioriteti i tij është të përfundojë luftën dhe të ndalojë shpenzimet e mëtejshme të burimeve të SHBA-ve. Kundërshtarët e tij demokratë e akuzojnë për afrim me presidentin rus Vladimir Putin dhe thonë se qasja e tij ndaj luftës është një dorëzim për Ukrainën dhe do të rrezikojë të gjithë Europën. /gazetametro.net
