Droni nuk u zbulua nga radarët e Ministrisë rumune të Mbrojtjes, pasi fluturonte në lartësi të ulët, thonë autoritetet.
Një dron u rrëzua në një zonë pyjore dhe shkaktoi zjarr të premten në qarkun Tulcea të Rumanisë juglindore, rreth 5 kilometra nga kufiri me Ukrainën, njoftuan autoritetet, transmeton Anadolu.
Droni nuk u zbulua nga radarët e Ministrisë rumune të Mbrojtjes, pasi fluturonte në lartësi të ulët, raportoi transmetuesi lokal Antena 3 CNN.
Informacionet fillestare treguan se mjeti ajror pa pilot shpërtheu gjatë rrëzimit në një zonë të pyllëzuar pranë Luncavitas, duke shkaktuar zjarr. Në zonë u dërguan ekipet e emergjencës, ndërsa Ministria e Mbrojtjes angazhoi një helikopter IAR 330 Puma SOCAT për të lokalizuar rrënojat.
Më vonë, autoritetet thanë se ekipet e kërkim-shpëtimit ende nuk e kishin gjetur vendin e saktë të rrëzimit. Vendndodhja e dhënë fillimisht në një telefonatë emergjence rezultoi e pasaktë dhe aty nuk u gjet asnjë zonë e djegur.
“Deri tani, nuk kemi raportuar viktima apo dëme të tjera materiale”, tha Dan Tanase, zëdhënës i Inspektoratit për Situatat e Emergjencave të Tulceas.
Dëshmitarët thanë se droni mund të jetë rrëzuar në një pjesë kodrinore dhe të pyllëzuar të maleve Macin.
Kryetari i Bashkisë së Luncavitas, Aurel Iorga, tha se droni kishte fluturuar mbi fshatin Rachelu para se të drejtohej drejt pyllit.
“Praktikisht mund të shihje se çfarë ishte shkruar në të. Ishte vërtet një nga momentet më të rrezikshme”, tha Iorga, duke shtuar se banorët ishin të frikësuar pasi mjeti fluturonte në lartësi shumë të ulët.
Autoritetet lëshuan paralajmërime përmes sistemit RO-Alert në qarqet Tulcea dhe Galati, duke u bërë thirrje banorëve të strehoheshin për shkak të mundësisë së rënies së objekteve nga ajri.
Kryeministri Ilie Bolojan tha se ushtria rumune duhet të pajiset me sisteme kundër dronëve “sa më shpejt të jetë e mundur”.
“Përballemi me një realitet që nuk mund ta mohojmë, përkatësisht se lufta ka pasoja, përfshirë edhe në kufijtë tanë”, tha ai.
