Qeveria e Spanjës ka miratuar një embargo të plotë mbi armët ndaj Izraelit, që përbën pjesë të një pakete masash të synuara për ndalimin e asaj që, siç ka thënë më herët kryeministri i vendit Pedro Sánchez, është gjenocid në Gaza.
“Dekreti ndalon çdo eksport të materialit mbrojtës, produkteve ose teknologjive me përdorim të dyfishtë drejt Izraelit, si edhe importin e pajisjeve të tilla në Spanjë”, tha ministri i Ekonomisë, Carlos Cuerpo, në një konferencë për shtyp.
Ai bllokon gjithashtu kërkesat për tranzitin e karburantit të avionëve me përdorim potencial ushtarak dhe ndalon importin e produkteve që vijnë nga vendbanimet izraelite në Bregun Perëndimor, përfshirë edhe reklamimin e tyre.
“Ky dekret është një hap i madh përpara dhe është pionier në nivel ndërkombëtar kur bëhet fjalë për një embargo të plotë armësh ndaj Izraelit”, theksoi Cuerpo.
Qeveria bëri të ditur se ky dekret e konsolidon në ligj ndalimin e shitjes ose blerjes së pajisjeve ushtarake me Izraelin, që ishte zbatuar që nga fillimi i ofensivës izraelite në Gaza.
