Në Beograd, sot mbahet një protestë e madhe studentore me moton “Shihemi në Vidovdan”, e cila nis në orën 18:00 në sheshin Slavija dhe do të zgjasë deri në orën 21:00.
Në kuadër të programit të protestës do të ketë 16 minuta heshtje në kujtim të viktimave nga shembja e mbulesës në Novi Sad, do të intonohet himni dhe do të mbahen fjalime nga studentët pjesëmarrës.
Studentët, të cilët janë në bllokadë të institucioneve të arsimit të lartë në Beograd, i kanë drejtuar një letër të hapur Qeverisë së Serbisë, duke paraqitur dy kërkesa të reja dhe duke dhënë ultimatum që ato të plotësohen deri në orën 21:00 të datës 28 qershor 2025.
Kërkesat e studentëve janë:
- Qeveria, në përputhje me nenin 109 të Kushtetutës së Republikës së Serbisë, t’i propozojë presidentit të shpërndajë Kuvendin Popullor dhe të shpallen zgjedhje të jashtëzakonshme parlamentare.
- Qeveria t’i bëjë apel Ministrisë së Punëve të Brendshme që të ndalojë mbajtjen e tubimeve të paralajmëruara në Parkun Pionir dhe rrugën “Trg Nikole Pašića”, në përputhje me nenin 18 të Ligjit për Tubime Publike.
Presidenti Aleksandar Vuçiq i refuzoi këto kërkesa një ditë më parë, duke deklaruar:
“S’ka nevojë të prisni deri nesër në ora 21. Serbia nuk pranon ultimatume, as nga fuqitë e mëdha, e as nga shërbyesit e tyre të brendshëm.”
Protestat e studentëve kanë nisur më 1 nëntor të vitit të kaluar, pas shembjes së stacionit hekurudhor në Novi Sad ku humbën jetën 16 persona. Protesta më e madhe deri më tani ishte ajo e mbajtur më 15 mars në Beograd.
