Duke folur në fluturimin e kthimit nga SHBA-ja, Erdogan vuri theksin mbi rrugën drejt paqes së qëndrueshme në Palestinë dhe masat e komunitetit ndërkombëtar
Presidenti i Turqisë, Recep Tayyip Erdogan, tha se ai dhe homologu i tij amerikan, Donald Trump, arritën një “mirëkuptim të përbashkët” se si të arrihet një armëpushim në Gaza dhe në fund paqe në gjithë Palestinën, raporton Anadolu.
“Ne shpjeguam se si të arrihet së pari një armëpushim në Gaza dhe në gjithë Palestinën, dhe pastaj të ecet drejt paqes së qëndrueshme. Kishte një mirëkuptim të përbashkët për këtë”, u tha gazetarëve Erdoğan, i cili u takua me Trumpin në Shtëpinë e Bardhë të enjten, në fluturimin e tij të kthimit nga SHBA-ja.
“Numri i vendeve që e njohin Palestinën ka shkuar mbi 150. Që kjo mbështetje të reflektohet në terren, bashkësia ndërkombëtare duhet të veprojë me vendosmëri dhe të marrë masa”, shtoi ai.
Erdoğan theksoi se zgjidhja me dy shtete mbetet “formula për paqe të qëndrueshme” në Lindjen e Mesme, duke paralajmëruar se situata aktuale është e paqëndrueshme. “Trump është gjithashtu i vetëdijshëm se gjërat nuk mund të vazhdojnë kështu”, tha ai.
“Ne diskutuam për katastrofën humanitare në Gaza dhe situatën në Siri. Unë mbështes vizionin e presidentit Trump për paqen globale. Arritëm një konsensus mbi nevojën për të ndaluar gjakderdhjen”, tha presidenti turk.
“Në Asamblenë e Përgjithshme të OKB-së, pamë edhe një herë se Izraeli ka filluar të izolohet me shtypjen dhe krimet kundër njerëzimit që ka kryer”, theksoi ai.
Lidhur me Sirinë, Erdoğan tha se organizatat terroriste “nuk kanë vend në të ardhmen e Sirisë dhe nuk do të kenë kurrë”, duke i bërë thirrje bashkësisë ndërkombëtare të ndërmarrë hapa për paqen dhe stabilitetin në këtë vend.
Presidenti turk tha se bisedimet e tij me Trumpin u zhvilluan “në një atmosferë të sinqertë, konstruktive dhe produktive”. “Siç e dini, marrëdhënia ime me zotin Trump ka qenë shumë e mirë që nga e kaluara”, shtoi ai.
Erdoğan gjithashtu vlerësoi mikpritjen në Shtëpinë e Bardhë. “Në Shtëpinë e Bardhë, u pritëm shumë mirë nga zoti Trump dhe delegacioni i tij, dhe po largohemi të kënaqur. Ishte një vizitë e bukur që nuk mund të njolloset nga asnjë shpifje”.
“Vëllimi tregtar midis Turqisë dhe SHBA-së dhe potenciali i tij janë të qarta. Ne kemi një objektiv prej 100 miliardë dollarësh. Si udhëheqës, ne kemi vullnetin politik për ta aktivizuar këtë”, tha ai.
Erdoğan gjithashtu foli për qasjen e Turqisë ndaj Mesdheut, duke thënë: “Qëndrimi ynë mbi burimet në Mesdhe është i qartë. Ne do të marrim pjesën tonë të drejtë të këtyre burimeve dhe do të punojmë së bashku me fqinjët tanë bazuar në parimin e ‘fitmit për të dyja palët’”.
Ai edhe një herë pohoi qëndrimin e vendosur të Turqisë për Qipron. “Kapitulli mbi federatën është i mbyllur për ne. Askush nuk mund të na tërheqë përsëri në debatet për federatën me lojëra fjalësh”, u shpreh presidenti turk Erdoğan.
