Ushtria izraelite (IDF) ka nisur hetimet e para penale për incidentet gjatë luftës në Rripin e Gazës, ndërsa mes tyre është edhe rasti i vrasjes së vajzës pesëvjeçare palestineze Hind Rajab, familjarëve të saj dhe ekipeve palestineze të shpëtimit.
Sipas një raporti të agjencisë AP, ushtria izraelite, nga rreth 150 incidente të shqyrtuara, ka vendosur të hapë hetime zyrtare për gjithsej pesë raste. Mes tyre është rasti i Hind Rajab, por edhe vrasja e 15 punonjësve shëndetësorë dhe pjesëtarëve të ekipeve palestineze të shpëtimit.
Në një njoftim zyrtar, IDF-ja për herë të parë pranoi se forcat e saj kishin hapur zjarr ndaj automjetit ku ndodhej vajza pesëvjeçare. Kjo paraqet një ndryshim të madh nga qëndrimi i mëparshëm i ushtrisë izraelite, e cila kishte mohuar kategorikisht çdo përfshirje. Në raportet paraprake pretendohej se njësitë izraelite “nuk ndodheshin pranë automjetit dhe as brenda rrezes së zjarrit”.
Ngjarja ndodhi në janar të vitit 2024 në pjesën veriore të Gazës, kur Hind ndodhej në një makinë së bashku me gjashtë anëtarë të familjes së saj. Pasi automjeti u ndalua dhe u qëllua, vajza ishte e vetmja që i mbijetoi sulmit të parë.
Hind mbeti për orë të tëra e bllokuar në automjet, e rrethuar nga trupat e pajetë të të afërmve të saj. Nga aty, përmes telefonit, ajo iu lut ekipeve palestineze të emergjencës që të vinin dhe ta shpëtonin. Regjistrimet e thirrjes së saj tronditëse për ndihmë u bënë shpejt publike dhe u përhapën në mbarë botën.
Edhe ambulanca e dërguar për ta shpëtuar u sulmua. Pas 12 ditësh kërkime, trupi i vajzës pesëvjeçare u gjet brenda automjetit, i cili ishte shkatërruar dhe i mbushur me vrima plumbash.
Ky rast u bë një nga simbolet më të njohura të vuajtjeve të civilëve dhe fëmijëve në Gaza, duke nxitur kërkesa të fuqishme nga komuniteti ndërkombëtar për përgjegjësi.
Për fatin tragjik të vajzës është realizuar edhe filmi “The Voice of Hind Rajab” (Zëri i Hind Rajab), i cili në vitin 2026 u nominua për çmimin Oscar.
