Kryeministri i Suedisë, Ulf Kristersson, dhe homologu i tij hungarez, Viktor Orbán, sot kanë shkëmbyer kritika të ashpra në platformën X, rrjeti social që vitet e fundit është kthyer në arenë debatesh ideologjike e politike, jo vetëm mes përdoruesve anonimë, por edhe mes liderëve kombëtarë.
Sipas reagimeve, Orbán duket se u irritua nga predikimet e Kristerssonit mbi sundimin e ligjit në Hungari dhe tendencat autokratike gjatë 15 viteve të mandatit të tij si kryeministër, të cilat bien ndesh me vlerat themelore të Bashkimit Evropian. Kryeministri hungarez iu përgjigj kolegut suedez, i cili gjithashtu i përket krahut të djathtë politik, me këto fjalë:
“Populli suedez meriton më mirë”
“Qeveria suedeze na mban ligjërata për sundimin e ligjit. Ndërkohë, sipas një artikulli të Die Welt, rrjetet kriminale po shfrytëzojnë fëmijët suedezë si vrasës, duke ditur se sistemi nuk do t’i dënojë. Vendi që dikur njihej për rend dhe siguri tani po shembet: mbi 280 vajza të mitura janë arrestuar për vrasje, familjet jetojnë në frikë. Kjo është rrëqethëse. Populli suedez meriton më mirë!”
Përveç kësaj, Orbán publikoi edhe një video ku shpjegon se në Suedi “nuk ka më rend e ligj, por sundon barbaria”, se këtë gjendje e ka ndjekur për 15 vite dhe se “Suedi është shkëputur nga civilizimi”. “Këta janë suedezët që na japin leksione për sundimin e ligjit,” përfundoi Orbán.
Kristersson në X shpërndau postimin e Orbánit dhe iu përgjigj: “Këto janë gënjeshtra të padëgjuara. Nuk është për t’u habitur që vijnë nga një njeri që po shkatërron sundimin e ligjit në vendin e vet. Orbán është i dëshpëruar përpara zgjedhjeve të ardhshme në Hungari.”
Gazeta konservatore gjermane Die Welt para disa ditësh publikoi një artikull për mënyrën se si bandat kriminale suedeze shfrytëzojnë të miturit për të kryer krime, por shifra për “280 vajza të mitura të arrestuara për vrasje” është e trilluar.
Zgjedhjet po afrojnë për të dy “Sivjet në Suedi rreth 280 vajza të moshës 15–17 vjeç janë hetuar për vrasje, vrasje nga pakujdesia ose krime të tjera të dhunshme. Nuk dihet cilat prej këtyre krimeve lidhen me krimin e organizuar,” shkruhej në artikullin e Die Welt.
Orbán do të përballet me zgjedhje parlamentare në prill të vitit të ardhshëm, dhe sondazhet aktualisht nuk tregojnë se do të sigurojë edhe një mandat. Edhe Kristersson pritet të përballet me zgjedhje në shtator 2026, ndërsa sondazhet aktuale nuk janë të favorshme për partinë e tij.
