Presidenti i Serbisë, Aleksandar Vuçiç, hodhi poshtë pretendimet e ministrit të Mbrojtjes së Bosnjë e Hercegovinës, Zukan Helez, lidhur me vizitën e tij të fundit në Bugojno, duke i cilësuar ato si gënjeshtra. Në përgjigje, Helez deklaroi se institucionet kompetente të Bosnjë e Hercegovinës kishin ndjekur çdo lëvizje të Vuçiçit gjatë qëndrimit të tij në vend dhe e akuzoi atë për ndjekjen e një politike që prodhon përçarje dhe emigrim.
Shkak për shkëmbimin e deklaratave të ashpra u bënë pretendimet e mëparshme të Helezit se pjesëtarë të Ministrisë së Punëve të Brendshme të Kantonit të Bosnjës Qendrore kishin larguar një grup personash të armatosur, të cilët, sipas tij, nuk ishin pjesë e sigurimit zyrtar të presidentit serb.
Vuçiç i mohoi këto pretendime, duke deklaruar se në shoqërimin e tij nuk kishte asnjë pjesëtar të sigurimit nga Serbia, por vetëm pjesëtarë të Njësisë Speciale Kundër Terrorizmit (SAJ) të Ministrisë së Punëve të Brendshme të Republikës Sërpska.
“A e dini se çfarë gënjeshtre e madhe është kjo? Nuk kishte asnjë njeri nga Serbia. Ata që ishin me ATV ishin pjesëtarë të MPB-së së Republikës Sërpska; kjo është në kompetencën e tyre. Gjithçka që ka shkruar është gënjeshtër. Nuk mund ta pranonte që erdha në Bugojnon e tij, por edhe timin, pa i kërkuar leje. Sepse për të ardhur në vendlindjen time nuk do t’i kërkoj leje askujt”, tha Vuçiç.
Duke vazhduar kritikat ndaj Helezit, Vuçiç pretendoi se ministri i Mbrojtjes së Bosnjë e Hercegovinës ka vite që bën deklarata të pavërteta dhe kujtoi edhe deklaratat e tij të mëparshme për “Sarajevo Safari”.
“O gënjeshtar, pse nuk më arrestove? Prej dy vitesh gënjen dhe të ka penguar që dyert e mia ishin të hapura për të gjithë. Erdha vetë tek ju, pse nuk më arrestuat? A kisha me vete disa pjesëtarë të njësisë Kobra? Jo, ata ishin pjesëtarë të SAJ-it të Republikës Sërpska”, u shpreh presidenti serb.
Deklaratave të Vuçiçit iu përgjigj ministri i Mbrojtjes i Bosnjë e Hercegovinës, Zukan Helez. Ai tha se institucionet e Bosnjë e Hercegovinës e kishin monitoruar vizitën e Vuçiçit dhe se, nëse do të kishte ekzistuar një urdhër arresti ndaj tij, ai do të ishte arrestuar.
“Presidenti i Serbisë, Aleksandar Vuçiç, duhet ta dijë se kemi ndjekur çdo lëvizje të tij gjatë vizitës në Bosnjë e Hercegovinë. Po të kishte ekzistuar një kërkesë për arrestimin e tij, ai do të ishte arrestuar. Nuk do ta mbronin as militantët partiakë e as çfarëdo sigurimi”, deklaroi Helez.
Ai shtoi se institucionet kompetente kishin qenë të informuara për organizimin e pritjes së Vuçiçit dhe pretendoi se bëhej fjalë për një shfaqje politike të inskenuar me kujdes.
Më pas, Helez e ftoi Vuçiçin të shëtisnin së bashku në Beograd, Novi Sad dhe Nish, duke pretenduar se presidenti serb nuk mund të lëvizë lirshëm në qytetet e vendit të tij pa një pritje të organizuar.
“Nëse ke guxim, hajde të ecim së bashku në Beograd, Novi Sad dhe Nish – unë si ministër i Mbrojtjes i Bosnjë e Hercegovinës, ti si president i Serbisë. Sot të gjithë e dinë se kudo që ke zhvilluar politikën tënde në emër të mbrojtjes së serbëve dhe serbizmit, sot ka më pak serbë – nga Gazivoda, përmes Glinës, deri në Çipuljiq. Pikërisht politika e Serbisë së Madhe që ke mbështetur prej vitesh ka lënë pas ndarje, shpërngulje dhe vatra të zbrazëta. Nëse vazhdon t’i mbrosh serbët dhe serbizmin në këtë mënyrë, do ta realizosh qëllimin ‘të gjithë serbët në një shtet’, por ai shtet do të jetë vetëm Serbia”, tha ai.
Në fund, Helez theksoi se kritikat e tij nuk drejtohen kundër popullit serb, por kundër politikës së Serbisë së Madhe, e cila, sipas tij, nuk i pranon krimet e kryera dhe promovon ndarjen në vend të paqes dhe bashkëpunimit.
