Hetimi lidhur me sulmin katastrofik ajror amerikan ndaj shkollës “Shajareh Tayyiba” në qytetin iranian Minab është bllokuar prej muajsh në nivelet më të larta të komandës ushtarake të Shteteve të Bashkuara të Amerikës.
Sipas burimeve të cituara nga CNN-i, udhëheqësit ushtarakë kanë penguar me vetëdije analizat standarde të inteligjencës, me qëllim që të fshihen hollësitë rreth asaj që ka ndodhur në të vërtetë.
Mediat shtetërore iraniane kishin publikuar më herët bilancin e tmerrshëm të këtij sulmi, në të cilin humbën jetën 168 fëmijë dhe 14 të rritur.
Fazat e para të verifikimit ushtarak, të përfunduara menjëherë pas sulmit, konfirmuan në mënyrë të qartë se Shtetet e Bashkuara ishin përgjegjëse për goditjen.
Dëshmitë tregojnë se ushtria amerikane e goditi aksidentalisht një shkollë fillore, pasi kishte përdorur informacione të vjetruara të inteligjencës.
Besohej se në atë lokacion ndodhej një bazë detare e Gardës Revolucionare Islamike të Iranit.
Burimet zbulojnë një fakt tronditës: komandantët e lartë ushtarakë amerikanë kishin shpërfillur qëllimisht paralajmërimet e qarta në bazat e të dhënave, sipas të cilave informacionet e inteligjencës për objektivat në Iran ishin të vjetruara dhe të paverifikuara.
Vendimi për t’i anashkaluar këto paralajmërime ishte marrë me vetëdije dhe me nxitim, në përpjekje për të siguruar objektiva që në fillim të luftës.
Burimet e CNN-it thonë se Pentagoni dhe Komanda Qendrore e Shteteve të Bashkuara, CENTCOM, po përpiqen në mënyrë të dëshpëruar ta kontrollojnë dëmin.
Zyrtarët nuk duan përsëritjen e situatës së një viti më parë, kur Agjencia e Inteligjencës së Mbrojtjes zbuloi se sulmet amerikane ndaj objekteve bërthamore iraniane nuk kishin dhënë rezultat, duke minuar drejtpërdrejt deklaratat publike të Donald Trumpit. Pas publikimit të atij raporti, drejtori i agjencisë ishte shkarkuar menjëherë.
Një raport i pavarur hetimor i ishte dorëzuar CENTCOM-it që në muajin prill, por që atëherë po mbahet në fshehtësi të rreptë.
Qasja në të dhëna dhe në intervistat me ushtarët që e realizuan sulmin u është lejuar vetëm një numri të vogël oficerësh. Në këtë mënyrë po pengohet drejtpërdrejt mundësia që komandantët e tjerë të nxjerrin mësime dhe të shmangin gabime të ngjashme në terren.
“Kurrë nuk kam parë që klasifikimi i të dhënave të përdoret për gjëra të tilla. Kur na izoloni vazhdimisht nga njëri-tjetri, ne nuk i fuqizojmë kapacitetet tona të përbashkëta. Një gjë të tillë e bëni vetëm nëse jeni në mënyrë të çuditshme paranojakë”, deklaroi njëri prej burimeve ushtarake.
Presidenti amerikan Donald Trump, gjatë një interviste për Fox News këtë javë, refuzoi të premtonte se rezultatet e hetimit do të publikoheshin ndonjëherë.
“Do të më duhet të flas me gjeneralët. Nuk mendoj se dikush do të jetë ndonjëherë në gjendje të thotë se çfarë ka ndodhur atje”, tha Trump.
Megjithëse pranoi se ishte “e mundur” që gabimi të kishte ardhur si pasojë e informacioneve të vjetruara të inteligjencës në mes të kaosit të luftës, Trump shprehu publikisht dyshime ndaj provave nga terreni.
Ai shkoi deri aty sa sugjeroi se pamjet satelitore, të cilat tregojnë fragmente të raketave amerikane në vendin ku ishte shembur shkolla, mund të ishin “gjeneruar nga inteligjenca artificiale”, pa ofruar asnjë provë për një pretendim të tillë.
