Delegacionet e Federatës Ruse dhe Republikës Popullore të Kinës nënshkruan sot një memorandum për ndërtimin e gazsjellësit “Fuqia e Siberisë 2”, i cili do t’i sigurojë Kinës transportin vjetor deri në 106 miliardë metra kub gaz natyror.
Marrëveshja është një nga katër të arritura midis gjigantit shtetëror energjetik rus Gazprom dhe Korporatës Kombëtare Kineze të Naftës.
Sipas drejtorit ekzekutiv të Gazpromit, Aleksei Miller, gazsjellësi “Fuqia e Siberisë 2” do të jetë projekti më i madh, më ambicioz dhe kapitalisht më intensiv në industrinë globale të gazit.
Projekti parashikon dërgimin e 106 miliardë metrave kub gaz natyror rus në Kinë çdo vit. Për krahasim, para agresionit rus ndaj Ukrainës në vitin 2022, Rusia eksportonte mbi 150 miliardë metra kub gaz çdo vit në Evropë.
Presidenti Vladimir Putin ia kishte prezantuar për herë të parë liderit kinez Xi Jinping këtë projekt me vlerë 13,6 miliardë dollarë në vitin 2022. Projekti, i cili synonte dërgimin e 50 miliardë metrave kub gaz çdo vit në veriperëndim të Kinës, kishte ngecur për shkak të negociatave të gjata mbi çmimet dhe sasinë.
Ceremonia e mbajtur sot në Pekin, ku ishin të pranishëm si Putin ashtu edhe Xi, shënoi angazhimin e parë formal për ta çuar projektin përpara.
