Një kafshë e madhe grabitqare nga familja e maceve – puma, panter apo jaguar – është parë duke ecur në pllajën e Shumenit në Bullgari, duke shkaktuar panik të madh te qytetarët.
Sipas autoriteteve, një qytetar njoftoi policinë para dy ditësh, pas orës 22:00, se kishte parë kafshën dhe e tregoi pamjen përmes një videoje. Më pas, gjurmë të dyshimta janë gjetur në disa pjesë të ndryshme të zonës.
Policia, xhandarmëria dhe ekspertë të jetës së egër kanë nisur një operacion të gjerë kërkimi, duke përdorur dronë me kamera termike, ndërsa i gjithë terreni ndodhet nën vëzhgim të rreptë.
Autoritetet kanë aktivizuar sistemin kombëtar të alarmimit BG-ALERT, për të informuar qytetarët:
“Qasja është e kufizuar. Shmangni zonën. Kushdo që sheh kafshën duhet të thërrasë në 112,” thuhet në njoftim.
Për kapjen e kafshës, janë vendosur 15 kurthe speciale, të cilat aktivizohen kur kafsha shkel mbi to. Janë përdorur gjithashtu gjurmë gjaku që çojnë drejt ushqimit dhe ujit, për të tërhequr grabitqarin.
Policia po publikon rregullisht raporte, foto dhe video, por deri më tani nuk ka asnjë rezultat konkret në lidhje me identifikimin apo kapjen e kafshës.
Autoritetet i bëjnë thirrje qytetarëve që të qëndrojnë larg zonës së rrezikut dhe të bashkëpunojnë me forcat e rendit për të garantuar sigurinë publike.
