Ministri i Jashtëm i Mbretërisë së Bashkuar, David Lammy, do të duhet të paguajë një gjobë deri në 2.500 paund pasi ka peshkuar pa licencë gjatë vizitës së nënpresidentit amerikan JD Vance në vend.
Lammy e priti Vance-in në pronën e tij dhe shfrytëzuan rastin për të shkuar për peshkim në një liqen privat aty pranë. Megjithatë, Lammy nuk kishte blerë paraprakisht licencën e kërkuar nga ligji britanik për çdo person mbi 13 vjeç që dëshiron të peshkojë, madje edhe në prona private.
Shefi i diplomacisë britanike e raportoi vetë shkeljen në Agjencinë për Mbrojtjen e Mjedisit dhe tani përballet me një gjobë që mund të arrijë deri në 2.500 paund, edhe pse shuma e saktë ende nuk dihet.
“Ministri i Jashtëm i ka dërguar një letër Agjencisë për Mbrojtjen e Mjedisit për shkak të një gabimi administrativ, si pasojë e të cilit nuk ishin siguruar lejet e nevojshme për peshkim në liqenin privat, si pjesë e angazhimeve diplomatike në rezidencën Chevening House javën e kaluar,” thuhet në deklaratën e zyrës së Lammy-t.
Ata shtuan se Lammy bleu licencën “menjëherë pasi kuptoi gabimin administrativ.”
Agjencia për Ruajtjen e Mjedisit theksoi shkurt se “çdokush duhet të blejë licencë për të ruajtur lumenjtë dhe liqenet” në Mbretërinë e Bashkuar.
Vance, duke iu referuar këtij episodi të vizitës së tij në Britani, tha se ai dhe Lammy nuk arritën të kapnin peshk, por këtë e bënë fëmijët e tij.
“Kjo është e vetmja njollë në marrëdhëniet tona speciale,” u shpreh me humor Vance pasi përfundoi vizitën, duke shtuar se peshqit e kapur u kthyen menjëherë në liqen. Ai gjithashtu e vlerësoi Lammy-n si “një mik të mirë” dhe “një mikpritës shumë, shumë të sjellshëm” gjatë takimit të tyre.
