Furnizuesi gjerman i mbrojtjes Renk ka kërcënuar se do të zhvendosë një pjesë të prodhimit jashtë vendit për të mundur të vazhdojë shitjen e pjesëve për tanket izraelite, pasi Berlini shpalli embargon e eksportit, shkruan Financial Times.
Shefi i kompanisë bavareze, e cila prodhon marshe që përdoren në tanket dhe automjetet e blinduara izraelite, tha se ka “përgjegjësi” për t’u siguruar që Izraeli mund të “ruajë aftësitë e tij të dekurajimit”.
Drejtori ekzekutiv Alexander Sagel tha për FT se Renk ende po përpiqet të kuptojë pasojat e njoftimit të javës së kaluar nga kancelari Friedrich Merz për pezullimin e shitjes së produkteve ushtarake që mund të përdoren në Gaza. Ai theksoi se kompania, si entitet gjerman, do të respektojë ligjet dhe rregulloret vendore, por shtoi se po shqyrtohen mënyra alternative për përmbushjen e kontratave nëse këto kufizime konfirmohen nga këshilli gjerman i sigurisë.
“Është e qartë që po diskutojmë për një plan B. Plani B është zhvendosja e prodhimit të këtyre marsheve specifike në SHBA,” tha Sagel, duke shtuar se Izraeli përbën 2–3% të shitjeve të kompanisë.
I pyetur për moralitetin e dërgimit të komponentëve për tanket izraelite, në një kohë kur Izraeli akuzohet për shkelje të rënda të të drejtave të njeriut, ai tha se bëhet fjalë për “një diskutim të vështirë”, por se nga këndvështrimi gjerman ekziston përgjegjësia për të mbështetur aftësitë mbrojtëse të Izraelit “jo vetëm në Gaza, por edhe në kufijtë e tjerë”.
Sagel nuk zbuloi sasinë e marsheve që mbeten për t’u dërguar, por tha se ekziston një kontratë për “qindra” njësi.
Izraeli është mbështetur gjerësisht te tanket dhe automjetet e blinduara në ofensivën e tij ushtarake në Gaza dhe pritet t’i përdorë ato sërish në ofensivën ndaj qytetit të Gazës, me imazhet satelitore që tregojnë grumbullimin e tyre pranë kufirit.
Renk raportoi të mërkurën se të ardhurat e gjysmës së parë të vitit 2025 u rritën në 620 milionë euro (22% më shumë se viti i kaluar), ndërsa fitimi i rregulluar para interesave dhe taksave u rrit me 29% në 89 milionë euro – rritje e nxitur nga shtimi i shpenzimeve të mbrojtjes në Evropë. Sagel paralajmëroi se nëse embargoja vazhdon, kjo mund të ulë fitimin operativ për disa milionë euro në gjysmën e dytë të vitit.
Vendimi gjerman për kufizimin e eksporteve të pajisjeve ushtarake erdhi mes reagimeve të forta ndërkombëtare ndaj veprimeve të qeverisë izraelite. Këtë javë, fondi norvegjez i naftës prej 2 trilionë dollarësh njoftoi se ka shitur një të pestën e aksioneve në kompani izraelite dhe ka ndërprerë bashkëpunimin me menaxherët izraelitë të fondeve, si përgjigje ndaj shqetësimeve publike për financimin e luftës në Gaza.
Ndërkohë, Armin Papperger, drejtori ekzekutiv i Rheinmetall, prodhuesit gjerman të municioneve për tanke, tha për FT se kompania e tij nuk po eksporton asnjë armë në Izrael.
