“Veprimet e SHBA-së dëmtojnë seriozisht paqen dhe sigurinë e rajonit, shkelin seriozisht sigurinë, sovranitetin dhe të drejtat dhe interesat legjitime të vendeve të tjera, shkelin seriozisht të drejtën ndërkombëtare”, tha Lin Jian
Kina kritikoi sot vendosjen e ushtrisë amerikane në ujërat pranë Venezuelës, duke theksuar se kjo “minon seriozisht” paqen rajonale dhe paralajmëroi Washingtonin kundër çdo ndërhyrjeje në punët e brendshme të vendit latino-amerikan, transmeton Anadolu.
“Veprimet e SHBA-së dëmtojnë seriozisht paqen dhe sigurinë e rajonit, shkelin seriozisht sigurinë, sovranitetin dhe të drejtat dhe interesat legjitime të vendeve të tjera, shkelin seriozisht të drejtën ndërkombëtare”, u tha gazetarëve në Pekin zëdhënësi i Ministrisë së Jashtme, Lin Jian.
Washingtoni ka vendosur shkatërruesit e Marinës USS Gravely, USS Jason Dunham dhe USS Sampson, pranë bregdetit të Venezuelës në fund të gushtit.
Në përgjigje, presidenti venezuelas Nicolas Maduro tha se ka mobilizuar 4.5 milionë forca të milicisë së vendit dhe ishte gati të zmbrapste çdo sulm. Të dielën, ministri venezuelas i Mbrojtjes, Vladimir Padrino Lopez tha se SHBA-ja ka kryer fluturime inteligjence në Karaibe dhe zonat afër vendit të tij.
Sekretari amerikan i Mbrojtjes, Pete Hegseth tha se ushtria amerikane është gati për një operacion për ndryshimin e regjimit në Venezuelë.
“Kina ka mbështetur gjithmonë forcimin e bashkëpunimit ndërkombëtar për të goditur krimet ndërkufitare”, tha zëdhënësi i Ministrisë së Jashtme në Pekin të hënën. Ai tha se SHBA-ja, nën “pretekstin e luftës kundër narkotikëve”, ka vendosur forca ushtarake pranë Venezuelës, ka fundosur anije dhe ka mbajtur anije peshkimi nga pala venezuelase, gjë që “shkaktoi tensione në situatën rajonale”.
“Ne kundërshtojmë përdorimin e paligjshëm të forcës. Ne kundërshtojmë çdo forcë të huaj që ndërhyn në punët e brendshme të Venezuelës nën çfarëdo preteksti”, tha Lin.
“Kina i bën thirrje SHBA-së të mos sabotojë sigurinë e lundrimit, lirinë dhe interesat e palës së Venezuelës sipas ligjit ndërkombëtar për të stabilizuar paqen dhe sigurinë”, shtoi ai.
Tensionet rreth Venezuelës u rritën pasi presidenti i SHBA-së, Donald Trump nënshkroi më parë një urdhër ekzekutiv që udhëzonte ushtrinë të përdorej më gjerësisht dhe në mënyrë efektive për të luftuar kartelet e drogës të Amerikës Latine në terren.
