Të paktën pesë persona kanë humbur jetën pas bombardimit izraelit të një kampi çadrash ku ishin strehuar të zhvendosurit në al-Mawasi, në jug të Gazës, deklaroi një burim nga spitali Nasser për Al Jazeera.
Ushtria izraelite disa herë e ka quajtur al-Mawasi “zonë të sigurt” dhe së fundmi ka lëshuar urdhra për dëbimin e detyruar të palestinezëve nga qyteti i Gazës për t’u zhvendosur drejt jugut.
Megjithatë, edhe pse ushtria e ka shpallur zonën si “të sigurt”, ajo e ka sulmuar disa herë “zonën humanitare”.
Përveç kësaj, sulmet prej mëngjesit kanë qenë aktive në mbarë Rripin e Gazës, dhe sipas informacionit aktual janë vrarë gjithsej 29 persona.
Nga këta, 17 janë vrarë në qytetin e rrethuar të Gazës, ku ushtria izraelite po intensifikon përpjekjet për zhvendosjen e mëtejshme të palestinezëve dhe pushtimin e qendrës më të madhe urbane të territorit.
