Gjatë marshimit, protestuesit reaguan kundër sulmeve dhe bllokadës së Izraelit ndaj Gazës dhe brohoritën slogane si “Liri për Palestinën”, “Qytetet tona me Palestinën”, “Ndaloni gjenocidin”
Mijëra njerëz në qytetin Katania në jug të Italisë, marshuan në mbështetje të Flotiljes Globale “Sumud”, e cila u nis nga Spanja për në Gaza për të thyer bllokadën izraelite dhe në mbështetje të palestinezëve, raporton Anadolu.
Mijëra persona që u mblodhën në portin e Katanias, një pikë takimi në lindje të Ishullit të Siçilisë për anijet nga Italia që do të bashkohen me Flotiljen Globale “Sumud”, marshuan drejt qendrës së qytetit me flamuj palestinezë në duar dhe tabela që shprehin mbështetje për Palestinën dhe flotiljen.
Marshimi i mijëra mbështetësve palestinezë, i cili përshkoi rrugët “Cali” dhe “Vittorio Emanuele II” si dhe sheshin “Duomo” në qendër të Katanias, përfundoi në vendin e tubimit në sheshin “Federico di Svevia”.
Gjatë marshimit, protestuesit reaguan kundër sulmeve dhe bllokadës së Izraelit ndaj Gazës dhe brohoritën slogane si “Liri për Palestinën”, “Qytetet tona me Palestinën”, “Ndaloni gjenocidin”, “Liri për Palestinën nga lumi në det” dhe “Intifada”.
Fjalët “Gaza, po vijmë” u paraqitën përmes një projektori në një ekran në zonën e tubimit në fund të procesionit. Një studente nga kolektivi studentor, një nga organizatorët e marshimit, në fjalimin e saj tha se 15 mijë njerëz kanë marrë pjesë në marshimin e tyre sot.
Ndërsa një aktivist tha: “Po bëjmë shumë pak. Duhet të bëjmë më shumë për të ndaluar këtë gjenocid”.
Një aktivist tjetër, duke theksuar rëndësinë e Flotiljes Globale “Sumud” tha: “Zemrat tona janë me miqtë tanë që do të nisen nga ky port dhe që po lëvizin nga porte të ndryshme mesdhetare për të thyer bllokadën në Gaza dhe për të sjellë ndihmë për ata që kanë mbetur të uritur dhe të etur në Palestinë sot”.
“Po u dërgojmë atyre mesazh solidariteti. Mesazhi ynë është gjithashtu se do të luftojmë. Ne organizuam protestë të mrekullueshme sot. Nesër do të kthehemi në punët tona, shkollat, universitetet dhe rutinat tona. Ndoshta ata duan të kthehen në normalitet në këtë mënyrë, por nuk mund të ketë diçka të tillë si kthimi në normalitet kur dhjetëra mijëra po masakrohen”, tha aktivisti.
Anijet nga Italia që do të marrin pjesë në Flotiljen Globale “Sumud” pritet të përfundojnë përgatitjet e tyre nga portet në lindje të Siçilisë të dielën, më 7 shtator, të takohen me ata që u nisen nga qyteti Barcelonë i Spanjës, dhe të vazhdojnë drejt për në Gaza.
– Flotilja Globale “Sumud”
Anijet që i përkasin flotiljes ndërkombëtare të ndihmës civile, Flotiljes Globale “Sumud” (Global Sumud Flotilla) e formuar me mbështetjen e mbi 44 vendeve për të demonstruar solidaritet me Palestinën dhe për të thyer bllokadën izraelite, u nisën drejt Gazës nga qyteti Barcelonës i Spanjës, më 31 gusht. Ditën e njëjtë, disa anije që transportonin 300 tonë ndihma nga qyteti italian Gjenova, u nisën drejt Mesdheut për t’u bashkuar me Flotiljen Globale “Sumud”.
“Sumud” që në arabisht do të thotë “vendosmëri” ose “vendosmëri e palëkundur”, u bë koncept i shtypjes dhe rezistencës midis popullit palestinez pas luftës gjashtëditore të vitit 1967. Koncepti i “Sumud”-it nënkupton nevojën që palestinezët të qëndrojnë në tokat e tyre, të ruajnë identitetin dhe kulturën palestineze dhe të kërkojnë mënyra për t’i rezistuar pushtimit dhe për të ndërtuar institucione alternative përmes mosbindjes civile jo të dhunshme.
Në aktivitetet artistike që lidhen me Palestinën, simbole të tilla si pema e ullirit dhe gruaja fshatare shtatzënë përdoren për të përshkruar këtë koncept.
