Ish-sekretari amerikan i Mbrojtjes dhe ish-drejtori i CIA-s, Leon Panetta, paralajmëroi se lufta me Iranin, e nisur nga presidenti Donald Trump, rrezikon të shndërrohet në një tjetër “luftë të pafundme” në Lindjen e Mesme.
Ai shtoi se trazirat aktuale në Pentagon po u dërgojnë kundërshtarëve të Shteteve të Bashkuara një mesazh të rrezikshëm dobësie.
Në një intervistë për The Guardian, Panetta deklaroi se lufta, e cila po zgjat prej më shumë se gjashtë muajsh, po shndërrohet në një konflikt të debatueshëm, nga i cili administrata amerikane nuk po arrin të gjejë rrugëdalje.
“Nuk është sekret se Shtetet e Bashkuara dhe Irani janë mbërthyer në një ngërç të tmerrshëm, në të cilin ekzistojnë shumë pak mundësi reale për përfundimin e luftës. Kjo po shkon drejt shndërrimit në një tjetër luftë të dështuar, si ato në Irak dhe Afganistan”, deklaroi Panetta.
Ai parashikoi se konflikti do të vazhdojë edhe për të paktën gjashtë muaj të tjerë, pa ndonjë zgjidhje konkrete.
Paralajmërimi i Panettas vjen vetëm disa ditë pasi sekretari i Ushtrisë amerikane, Dan Driscoll, dha dorëheqjen në mes të konfliktit. Dorëheqja thuhet se lidhet me tensionet me sekretarin e Mbrojtjes, Pete Hegseth, dhe një seri shkarkimesh.
“Forcat amerikane po hyjnë në luftë në një kohë kur në Pentagon dhe në strukturën komanduese mbizotëron një trazirë e madhe, duke krijuar përshtypjen se askush nuk i mban fijet në duar”, shtoi Panetta.
Ai theksoi se kundërshtarë si Kina, Rusia dhe Koreja e Veriut po e shikojnë tani SHBA-në dhe po shohin dobësi.
Pentagoni i hodhi poshtë këto pretendime. Zëdhënësi Sean Parnell deklaroi se pretendimet për kaos janë të pabazuara dhe se zhvillimet në Departamentin e Mbrojtjes përbëjnë një proces reformimi.
Panetta analizoi edhe pozitën e presidentit Donald Trump, i cili, sipas tij, është “i zënë mes çekanit dhe kudhrës”.
Sipas Panettas, Trump ka tri mundësi.
Mundësia e parë është të tërhiqet dhe ta pranojë dështimin, gjë që, sipas Panettas, është pothuajse e pamundur të pritet.
Mundësia e dytë është vazhdimi i ngërçit aktual, i shoqëruar me sulme të herëpashershme, çka do të çonte drejt një tjetër lufte të gjatë në Lindjen e Mesme.
Mundësia e tretë dhe, sipas tij, e vetmja që mund të çojë drejt “fitores”, është marrja nën kontroll e Ngushticës së Hormuzit, me qëllim eliminimin e ndikimit iranian mbi tregtinë botërore.
“Presidenti ose ndërhyn dhe bën atë që është e nevojshme për ta hapur Ngushticën e Hormuzit, ose vazhdon lojën duke u shtirur sikur po fiton, ndonëse kjo nuk është e vërtetë”, deklaroi Panetta.
Ai shtoi se Trump e ka dëmtuar besueshmërinë e tij me pretendime të përsëritura dhe të pavërteta se marrëveshja për përfundimin e luftës ishte shumë pranë.
