Kryeministri Albin Kurti ka zhvilluar një sërë takimesh bilaterale në Nju Jork. Ai është takuar me presidentin e Turqisë, Recep Tayyip Erdoğan, kryeministrin e Kroacisë, Andrej Plenkoviq, përfaqësuesen e lartë të BE-së, Kaja Kallas, si dhe me senatorë dhe kongresistë amerikanë.
Sipas njoftimeve të Qeverisë, Kurti në këto takime ka shprehur shqetësimin për dënimet e rënda dhe, siç i ka cilësuar ai, të padrejta ndaj ish-drejtuesve të UÇK-së në aktgjykimin e shkallës së parë të Dhomave të Specializuara, pas një procesi që, sipas tij, nuk ka qenë transparent në tërësinë e tij.
“Është mirë që zoti Kurti e ka kuptuar se është e rëndësishme diplomacia, por, nga ana tjetër, kam përshtypjen që edhe ai, ashtu sikurse qeveritë paraardhëse, më shumë i zhvillon takimet për t’u dukur në sytë e publikut në Kosovë, sesa për të vazhduar punën dhe bashkëpunimin me shtetet dhe përfaqësuesit e shteteve me të cilat takohet. Tani, sa i përket Gjykatës Speciale, mendoj se adresa do të duhej të ishte në Shtetet e Bashkuara të Amerikës, në takim me përfaqësuesit e shtetit amerikan, gjë që deri tani nuk e kemi parë. Kemi parë takime me disa kongresistë, që është mirë, por jo me përfaqësuesit zyrtarë të shtetit, në kuptimin e qeverisë dhe administratës, sepse kongresistët janë të rëndësishëm, por kanë pozita të ndryshme. Ndërsa adresa tjetër do të duhej të ishte Bashkimi Evropian, sepse Gjykata Speciale është themeluar nën ombrellën e Bashkimit Evropian. Tani, nuk ka shumë për t’u bërë, për hir të së vërtetës, sepse do të jetë shkalla e dytë e apelit dhe nuk do të mund të devijohet ky proces. Mendoj se Qeveria e Kosovës do të duhej ta ndihmonte procesin këtu brenda, duke ndihmuar në financimin e avokatëve më të mirë, në mënyrë që të ketë një vendim tjetër që do t’i shkonte më për shtat Republikës së Kosovës”, deklaron Lama.
Ndërkohë, ish-diplomati Albert Prenkaj ka kërkuar që çështja e dënimit të ish-krerëve të UÇK-së të trajtohet përmes një angazhimi të vazhdueshëm diplomatik.
Prenkaj ka thënë se delegacioni i Kosovës në Nju Jork duhet ta ketë adresuar këtë çështje në takimet me përfaqësuesit e shteteve, por ka shprehur dyshime nëse një gjë e tillë është bërë në mënyrë të mjaftueshme.
Sipas tij, Kosova duhet ta mbajë të hapur këtë çështje dhe të përdorë rrjetin diplomatik për të përcjellë mesazhin e saj në qendrat kryesore ndërkombëtare.
“Ky institucion gjyqësor, të cilin e ka formuar Kuvendi i Kosovës, është bërë në koordinim me komunitetin ndërkombëtar dhe besoj se bashkë me ta ky trup gjyqësor duhet të marrë një formë të qartë dhe të bëjë lidhjen juridike me Kosovën. Nuk duhet të shndërrohet në një ishull të paprekshëm, i cili është predispozuar ta dëmtojë Kosovën…Unë shpresoj që ky delegacion i Kosovës, i cili gjendet në Nju Jork këto ditë, e ka përmendur këtë çështje dhe ka kërkuar që ajo të adresohet në mënyrë të duhur. Por dyshoj në këtë, meqenëse… Kjo është në mënyrë informative ajo që zakonisht krerët e shtetit e bëjnë me krerët e tjerë të shteteve.Por unë mendoj, prandaj edhe e shpreha dyshimin, se duhet të bëhet edhe më tutje. Të lihet dera e hapur dhe në këtë drejtim të bashkëpunohet në vazhdimësi. Ne e kemi rrjetin diplomatik në qendrat e ndryshme dhe të rëndësishme botërore, i cili duhet të shfrytëzohet për të përcjellë mesazhin e Kosovës. Mesazhin e qytetarëve të pakënaqur, të cilët qëndrojnë në rrugë dhe presin që kasta politike ta adresojë këtë çështje”, thotë ai.
Gjykata Speciale më 16 shtator dënoi me gjithsej 81 vjet burg ish-krerët e UÇK-së, Hashim Thaçin, Kadri Veselin, Jakup Krasniqin dhe Rexhep Selimin, për, siç është thënë, krime lufte.
