Iraku iu përgjigj pozitivisht propozimit të Turqisë për një qendër të përbashkët operacionale për bashkëpunim në luftën kundër terrorizmit të Partisë së Punëtorëve të Kurdistanit (PKK).
Duke cituar vendimin e fundit të qeverisë irakiane për ta shpallur PKK-në një organizatë terroriste, burime nga Ministria e Mbrojtjes Kombëtare u thanë mediave turke se Ankaraja dhe Bagdadi vazhdojnë të bashkëpunojnë në fushën e sigurisë kufitare dhe në luftën kundër terrorizmit.
“Pala irakiane e sheh gjithashtu grupin terrorist PKK si një kërcënim. Ata janë pozitivisht të prirur ndaj propozimeve tona për një qendër të përbashkët operacionale dhe përpjekje të tjera të përbashkëta për të luftuar terrorizmin,” thanë burimet.
Turqia dhe Iraku kanë zhvilluar vizita të nivelit të lartë dhe kanë diskutuar çështje dypalëshe dhe rajonale në muajt e fundit.
“Bisedimet midis dy palëve mbuluan një gamë të gjerë temash, duke përfshirë çështjet e energjisë dhe tregtisë,” tha një burim turk i mbrojtjes.
Burimet theksuan gjithashtu rëndësinë e operacionit kundër terrorizmit të Turqisë në Irak, duke shtuar se operacioni aktual do ta arrijë qëllimin shumë shpejt.
Terroristët e PKK-së shpesh fshihen në Irakun verior për të planifikuar sulme ndërkufitare në Turqi.
Për sulmet e fundit terroriste nga PKK, burimet thanë: “Këto sulme të organizatës terroriste janë grahmat e saj të fundit. Kjo nuk do t’i shpëtojë ata nga fundi i ardhshëm”.
Presidenti turk Rexhep Tajip Erdogan premtoi së fundmi se do ta kthejë problemin e terrorizmit kufitar në Turqi një gjë të së kaluarës deri në këtë verë.
