Presidenti i Argjentinës, Javier Milei, ka kërcënuar me nisjen e procedurave ligjore kundër qeverisë britanike nëse brenda dy javësh nuk ndërpret punimet për kërkimin e naftës pranë Ishujve Falkland.
Milei deklaroi se Londra ka 14 ditë për t’u tërhequr nga projekti i fushës së naftës “Sea Lion”, një sipërmarrje e përbashkët e kompanive britanike dhe izraelite.
Nëse kërkesa nuk përmbushet, ai paralajmëroi se Argjentina do të nisë arbitrazh ndërkombëtar dhe do ta dërgojë çështjen në Tribunalin Ndërkombëtar për të Drejtën e Detit, me seli në Hamburg.
Fusha e naftës “Sea Lion”, e cila ndodhet rreth 209 kilometra larg brigjeve të arkipelagut që Argjentina e quan Las Malvinas, vlerësohet se përmban rreth 1,7 miliardë fuçi naftë.
Kompania britanike Rockhopper Exploration dhe kompania izraelite Navitas Petroleum planifikojnë të fillojnë nxjerrjen e naftës gjatë dy viteve të ardhshme, duke theksuar se posedojnë licenca të vlefshme të lëshuara nga autoritetet e Ishujve Falkland.
Nga ana tjetër, Milei e cilësoi projektin si “plaçkitje të paligjshme të burimeve” dhe si një “rrezik të qartë dhe të menjëhershëm”.
Ky ultimatum i tensionon edhe më tej marrëdhëniet ndërmjet dy vendeve.
Veprimi vjen pak pasi Milei, gjatë Asamblesë së Përgjithshme të OKB-së, kritikoi ashpër Kombet e Bashkuara, duke i cilësuar ato si një “organizatë të padobishme” për shkak të mungesës së veprimit lidhur me çështjen e sovranitetit mbi arkipelagun.
