Gjykata e Lartë Penale e Stambollit ka urdhëruar lëshimin e një fletarrestimi ndërkombëtar, përkatësisht një njoftimi të kuq të Interpolit, ndaj kryeministrit izraelit Benjamin Netanyahu.
Vendimi, i marrë nga Gjykata e 11-të e Lartë Penale në Stamboll, është pjesë e një procesi gjyqësor në vazhdim që lidhet me ndalimin ushtarak të flotiljes humanitare Sumud, e cila transportonte ndihma për Gazën dhe në mesin e pasagjerëve të së cilës ndodheshin edhe shtetas turq.
Vendimi gjyqësor drejtohet kundër Netanyahut në kuadër të një kallëzimi të gjerë penal të paraqitur në Turqi. Prokuroria e akuzon kryeministrin izraelit për gjenocid, krime kundër njerëzimit, torturë dhe shkaktim të qëllimshëm të lëndimeve trupore.
Në aktakuzë përfshihen gjithashtu akuza për dëmtim të pronës, grabitje të rëndë, pengim të qarkullimit, si dhe rrëmbim ose ndalim të paligjshëm të anijes.
Vendimi i fundit pasoi një aktvendim paraprak të muajit nëntor 2025, kur një gjykatë në Stamboll lëshoi urdhrat e parë të arrestimit ndaj Netanyahut dhe dhjetëra zyrtarëve izraelitë.
Këto urdhra kishin të bënin si me incidentin e flotiljes humanitare, ashtu edhe me veprimet e ushtrisë izraelite gjatë fushatës ushtarake në Gaza.
Në prill të vitit 2026, Prokuroria e Përgjithshme e Stambollit përfundoi aktakuzën, përmes së cilës kërkon dënime të përjetshme me burgim në rrethana të rënduara për të akuzuarit.
Prokurorët turq pretendojnë se Turqia ka juridiksion të qartë ligjor për zhvillimin e këtij procesi, bazuar në të drejtën ndërkombëtare detare.
