Presidenti i Turqisë, Recep Tayyip Erdogan, ka udhëtuar për në New York ku do të marrë pjesë në sesionin e Asamblesë së Përgjithshme të OKB-së, dhe me këtë rast iu drejtua gazetarëve duke folur për situatën në Gaza si dhe për vendimet e vendeve perëndimore që ta njohin Palestinën si shtet të pavarur.
Erdogan tha se këtë vit pritet pjesëmarrja e më shumë se 140 vendeve në nivel të shefave të shteteve dhe qeverive në diskutimet e Asamblesë së Përgjithshme, ku janë të përfaqësuara të gjitha shtetet anëtare të OKB-së.
“Nuk ka justifikim që zgjidhja e krizave humanitare, veçanërisht, t’u lihet në dorë vendeve me të drejtë vetoje në Këshillin e Sigurimit. Bota është më e madhe se pesë (anëtarët e përhershëm të KS-së)”, tha ai.
Ai njoftoi se ditën e parë të sesionit, më 23 shtator, do t’i drejtohet asamblesë.
“Në fjalimin tim do të ndalem posaçërisht te katastrofa humanitare dhe krimet në Gaza. Do të flas gjithashtu për përpjekjet e Turqisë për të siguruar stabilitet në rajon dhe kontributin e saj për ruajtjen e paqes ndërkombëtare. Të drejtat e vëllezërve dhe motrave tona në Republikën Turke të Qipros së Veriut do të jenë sërish në rendin tonë të ditës. Do të kem përsëri mundësinë t’ia shpjegoj botës tërë politikën e jashtme të Turqisë, e cila zhvillohet me vizion të thellë, qasje dhe perspektivë të frymëzuar nga shqiponja dykrerëshe selxhuke”, tha ai.
Ai u ndal edhe te çështja e njohjes së shtetit të Palestinës.
“Ajo që e veçon këtë Asamble të Përgjithshme nga të tjerat është fakti që shumë vende do ta njohin Shtetin e Palestinës. Shpresojmë që këto vendime për njohje do ta përshpejtojnë implementimin e zgjidhjes me dy shtete. Natyrisht, prania e qeverisë së re të fqinjit tonë, Sirisë, e cila fitoi lirinë me revolucionin e 8 dhjetorit pas një periudhe të përgjakshme dhe të errët 14-vjeçare, është një zhvillim shumë i mirëpritur për ne. Besoj se kjo Asamble e Përgjithshme do të kontribuojë në paqen e qëndrueshme për vëllezërit dhe motrat tona siriane, të cilët kanë vuajtur shumë dhe kanë paguar një çmim jashtëzakonisht të lartë për lirinë e tyre”, tha ai.
Në fund, Erdogan iu përgjigj pretendimeve të kryetarit të opozitës CHP, Ozgur Ozel, se gjoja është arritur një marrëveshje për Gazën nëpërmjet djalit të Donald Trumpit.
“A ka qenë ai me ne? Ju nuk e besoni vallë një gjë të tillë? Miq, nuk dua t’i ofendoj të shurdhët, por të shurdhët nuk dëgjojnë dhe shpikin gjëra. Ai njeri gjithmonë shpik gjëra. Zëdhënësi i partisë sonë e dha përgjigjen e nevojshme në mënyrën më të mirë. Dhe ne do ta japim përgjigjen e duhur në mënyrë shumë më të gjerë herën e parë që të kemi mundësi. Ne kurrë nuk e kemi konsultuar, as nuk do ta konsultojmë, Ozgur Ozelin për blerjen e avionëve. Ai sidoqoftë nuk i kupton këto gjëra. Nuk është fusha e tij e ekspertizës. Prandaj, nëse do të kryenim ndonjë transaksion me z. Trump, qoftë midis Turqisë dhe SHBA-së, nuk do ta bënim përmes djalit të tij. Do ta bënim drejtpërdrejt me vetë Trumpin”, përfundoi Erdogan.
