Shërbimet e sigurisë së Polonisë kanë neutralizuar një dron që fluturonte mbi ndërtesat qeveritare në qendër të Varshavës, ndërsa dy shtetas bjellorusë janë arrestuar, konfirmoi të hënën kryeministri Donald Tusk.
“Shërbimi i Sigurisë së Shtetit sapo ka neutralizuar një dron që po operonte mbi ndërtesën qeveritare në rrugën Parkowa dhe mbi pallatin Belweder,” shkroi Tusk në platformën X. Belweder është një nga rezidencat zyrtare të presidentit të Polonisë.
“Dy shtetas bjellorusë janë arrestuar. Policia po heton rrethanat e incidentit,” shtoi kryeministri.
Incidenti ndodhi në një kohë kur Polonia ndodhet në gjendje të lartë gatishmërie, pasi javën e kaluar u regjistrua depërtimi më i madh i dronëve rusë në hapësirën e saj ajrore që nga fillimi i luftës në Ukrainë.
Atëherë avionët luftarakë perëndimorë për herë të parë kishin rrëzuar objektiva rusë, gjë që shkaktoi shqetësim të ri në rajon, i cili që prej vitit 2022 – kur Moska nisi pushtimin e Ukrainës – është në gjendje të vazhdueshme tensioni.
Tusk atëherë kishte paralajmëruar se kjo ishte “momenti më afër që kemi qenë ndonjëherë një konflikti të hapur që nga Lufta e Dytë Botërore”.
