Kryeministri polak, Donald Tusk tha se ka kërkuar të aktivizohet Neni 4 i traktatit të NATO-s dhe se është në konsultime të vazhdueshme me aleatët për të forcuar mbrojtjen ajrore të Polonisë.
“Fakti që këta dronë, të cilët paraqisnin kërcënim për sigurinë, u rrëzuan, ndryshon situatën politike. Prandaj, konsultimet me aleatët morën formën e një kërkese zyrtare për aktivizimin e Nenit 4 të Traktatit të NATO-s,” tha Tusk.
Kryeministri polak shtoi gjithashtu se Polonisë i nevojitet më shumë sesa shprehje solidariteti dhe më shumë mbështetje nga aleatët.
Tusk shtoi se nuk ka asnjë arsye të thuhet se Polonia ndodhet në gjendje lufte, por se është në një situatë më të afërt me konflikt të armatosur që nga Lufta e Dytë Botërore.
Por çfarë thotë Neni 4 i traktatit të NATO-s?
Neni 4 përcakton se vendet anëtare të NATO-s do të konsultohen së bashku sa herë që, sipas mendimit të secilit prej tyre, territori, pavarësia politike ose siguria e ndonjërit prej tyre është e kërcënuar.
Sipas Nenit 4, diskutimet në Këshillin e Atlantikut të Veriut, organi kryesor politik vendimmarrës i NATO-s, mund të çojnë potencialisht në ndonjë formë vendimi ose veprimi të përbashkët.
/Reporteri.net/
