Komisioni Evropian ka paraqitur një paketë të fuqishme sanksionesh të synuara ndaj ministrave ekstremistë të kabinetit izraelit, kolonëve të dhunshëm dhe entiteteve që mbështesin mosndëshkimin në Bregun Perëndimor, së bashku me një propozim për pezullimin e pjesshëm të koncesioneve tregtare me Izraelin, tha shefja e politikës së jashtme të BE-së, Kaja Kallas, transmeton Anadolu.
Kallas tha se të gjitha shtetet anëtare bien dakord se situata në Gaza është “e paqëndrueshme”, duke paralajmëruar gjithashtu se “zhvillimet e rrezikshme” në Bregun Perëndimor po kërcënojnë mundësinë e një zgjidhjeje me dy shtete.
Duke folur pas një mbledhjeje të Komisionit, Kallas kritikoi gjithashtu avancimin ushtarak të qeverisë izraelite në Qytetin e Gazës, duke e përshkruar atë si një përshkallëzim të ri që do të thellojë më tej krizën humanitare.
Masat e planifikuara nga Komisioni Evropian duhet të miratohen nga shtetet anëtare.
“Dua të jem shumë e qartë, qëllimi nuk është të ndëshkohet Izraeli. Qëllimi është të përmirësohet situata humanitare në Gaza”, tha ajo.
“Të gjitha shtetet anëtare bien dakord se situata në Gaza është e paqëndrueshme. Lufta duhet të marrë fund. Vuajtjet duhet të ndalen dhe të gjithë pengjet duhet të lirohen. Duhet të përdorim të gjitha mjetet që kemi drejt këtij qëllimi. Nuk duhet gjithashtu të humbasim nga sytë zhvillimet e rrezikshme në Bregun Perëndimor që e zvogëlojnë mundësinë e një zgjidhjeje me dy shtete”, shtoi ajo.
Javën e kaluar, presidentja e Komisionit Evropian, Ursula von der Leyen, njoftoi se do të propozojë një paketë masash kundër Izraelit, duke përfshirë pezullimin e mbështetjes dypalëshe, pezullimin e pjesshëm të Marrëveshjes së Asociimit dhe vendosjen e sanksioneve ndaj ministrave ekstremistë të kabinetit.
Ushtria izraelite ka vazhduar ofensivën brutale ndaj Rripit të Gazës, duke vrarë pothuajse 65.000 palestinezë që nga tetori i vitit 2023. Fushata ushtarake e ka shkatërruar enklavën, ndërsa ekspertët kanë shpallur gjendje urie.
