Kryeministri britanik Keir Starmer, presidenti i Këshillit Evropian Antonio Costa dhe presidentja e Komisionit Evropian, Ursula von der Leyen dënuan së bashku ofensivën ushtarake izraelite në Gaza
Kryeministri britanik Keir Starmer, presidenti i Këshillit Evropian Antonio Costa dhe presidentja e Komisionit Evropian, Ursula von der Leyen dënuan së bashku ofensivën ushtarake izraelite në Gaza gjatë një konference për media pas samitit Britani-BE, raporton Anadolu.
Starmer i përshkroi sulmet izraelite ndaj Gazës si “të papranueshme, të patolerueshme” dhe theksoi urgjencën e një përgjigjeje të koordinuar ndërkombëtare. “Kjo është arsyeja pse po punojmë intensivisht për t’u koordinuar me udhëheqësit se si t’i përgjigjemi kësaj”, tha ai.
Duke bërë thirrje për një ndërprerje të menjëhershme të dhunës, presidenti i Këshillit Evropian Antonio Costa tha: “Izraeli duhet të ndalet tani, menjëherë, dhe ne kemi nevojë të gjithë së bashku si bashkësi ndërkombëtare për të ndihmuar në ndërtimin e dy shteteve”.
Shefja e KE-së, Ursula von der Leyen përshkroi një pamje të zymtë të krizës humanitare në Gaza, duke thënë: “Situata humanitare në Gaza është e papranueshme prej dy muajsh. Nuk ka hyrë asnjë furnizim humanitar në Gaza. Ndihma duhet të arrijë menjëherë te civilët në nevojë dhe bllokada ndaj Gazës duhet të hiqet tani, sepse ndihma humanitare nuk duhet të politizohet kurrë”.
Ajo gjithashtu kërkoi përpjekje të reja diplomatike për t’i dhënë fund konfliktit.
“Ne po bëjmë thirrje për rifillimin e armëpushimit dhe lirimin e menjëhershëm të pengjeve në mënyrë që të arrihet përfundimisht një fund i përhershëm i armiqësive. Jemi të bindur se e vetmja zgjidhje është zgjidhja me dy shtete. Kjo kërkon, ndër të tjera, edhe një Autoritet Palestinez funksional. Ne po e mbështesim dhe financojmë fuqimisht Autoritetin Palestinez”, shtoi Von der Leyen.
