Mediet turke raportojnë se shërbimet e inteligjencës dhe policisë së Turqisë kanë ndaluar Michael Ganoe-n, një gazetar dhe aktivist kontrovers i njohur për mbështetjen e hapur ndaj Izraelit dhe ushtrisë izraelite (IDF), për shkak të veprimeve të tij gjatë protestave në Stamboll.
Sipas këtyre burimeve, ndaj Ganoe-t janë nisur procedurat e dëbimit, dhe arrestimi i tij ka shkaktuar shumë spekulime për një përfshirje të mundshme të Izraelit në zhvillimet politike në Turqi.
Kush është Michael Ganoe?
Michael Ganoe është një gazetar dhe aktivist amerikan i cili prej vitesh deklarohet hapur si përkrahës i flaktë i politikave izraelite dhe i IDF-së. Ai e përshkruan veten si një i krishterë evangjelist dhe kundërshtar i ashpër i islamit, dhe njihet për deklaratat e tij kontroverse ku islamin e ka quajtur “burim të së keqes”.
Ai është gjithashtu themelues i organizatës Insight to Israel – Chocolates for Heroes, e cila merret me dërgimin e dhuratave dhe mesazheve mbështetëse për ushtarët izraelitë. Ganoe ka vizituar disa herë bazat ushtarake izraelite, ku ka mbajtur fjalime për ushtarët, ka promovuar ide cioniste dhe ka lavdëruar ushtrinë izraelite si “mbrojtëse të civilizimit”.
Aktiviteti i tij nuk kufizohet vetëm në Izrael – Ganoe është shpesh i pranishëm në ngjarje politike dhe shoqërore në pjesë të ndryshme të botës, ku përhap hapur qëndrime pro-izraelite. Në të kaluarën ka shprehur mbështetje për idetë që vendet e shenjta islame, përfshirë Kupolën e Shkëmbit në Jerusalemi, duhet të shkatërrohen për t’i hapur rrugë rindërtimit të tempullit hebraik të lashtë.
Sipas mediave turke, Ganoe ishte aktiv gjatë protestave në mbështetje të Ekrem Imamoglu-t, kryetarit të bashkisë së Stambollit, i cili po përballet me një hetim për aktivitet të supozuar korruptiv dhe lidhje me organizata terroriste. Thuhet se përmes rrjeteve të tij sociale, ai ka bërë thirrje për shpërndarjen e videove të protestave dhe ka kërkuar mbështetje nga opinioni ndërkombëtar, duke pretenduar se autoritetet turke kishin kufizuar qasjen në internet.
Mediet proqeveritare turke spekulojnë se prania e Ganoe-t në protesta nuk ishte rastësore dhe se mund të jetë pjesë e një operacioni më të gjerë izraelit për destabilizimin e skenës politike në Turqi. Lidhja e tij shumëvjeçare me ushtrinë izraelite dhe organizatat cioniste të krahut të djathtë përforcojnë më tej dyshimet se ai ka ardhur në Turqi me një mision të veçantë.
Pushteti turk dhe përfshirja izraelite
Edhe pse institucionet zyrtare të Turqisë nuk e kanë akuzuar drejtpërdrejt Izraelin për ndërhyrje në çështjet e brendshme të vendit, mediat turke theksojnë se arrestimi i Michael Ganoe-t mund të jetë dëshmi e përpjekjeve për ndikim të huaj mbi proceset politike në vend. Tensionet mes Ankarasë dhe Tel Avivit janë të pranishme prej kohësh, sidomos pasi Turqia ka mbajtur një qëndrim kritik ndaj politikave izraelite në Gaza dhe territoret palestineze të okupuara.
Ganoe, i cili ndodhet aktualisht në paraburgim dhe pret dëbimin, ende nuk ka komentuar publikisht për arrestimin e tij, por qëndrimet dhe aktivitetet e tij të mëparshme tregojnë se ai është një person që nuk fsheh aspak synimet e tij politike dhe ideologjike. Mbetet të shihet se cilat do të jenë reagimet e mëtejshme të autoriteteve izraelite dhe turke, por arrestimi i tij tashmë ka shkaktuar reagime të shumta në mediat turke.
