Agjencia tha se goditja me predhë ka shkaktuar zjarr në bordin e anijes, i cili më vonë është shuar.
Një anije është goditur sot nga një predhë rreth 18 milje detare në lindje të Khasabit, në Oman, duke shkaktuar zjarr që më vonë është shuar, njoftoi Qendra e Operacioneve të Tregtisë Detare e Mbretërisë së Bashkuar (UKMTO), transmeton Anadolu.
Në një njoftim, UKMTO-ja tha se ka marrë informacion për incidentin nga një burim i verifikuar.
Agjencia tha se goditja me predhë ka shkaktuar zjarr në bordin e anijes, i cili më vonë është shuar.
UKMTO-ja tha se nuk është raportuar asnjë ndikim mjedisor dhe se anija dhe ekuipazhi i saj janë të sigurt.
Agjencia nuk e bëri të ditur emrin e anijes, flamurin nën të cilin lundronte, pronësinë apo llojin e predhës së përdorur.
Ajo tha se autoritetet përkatëse po hetojnë incidentin dhe u bëri thirrje anijeve që lundrojnë në këtë zonë të tregojnë kujdes dhe të raportojnë çdo aktivitet të dyshimtë.
Më herët sot, Emiratet e Bashkuara Arabe akuzuan Iranin se kishte goditur me raketë një anije të Kompanisë Kombëtare të Naftës së Abu Dhabit (ADNOC) ndërsa ajo po kalonte në Ngushticën e Hormuzit. Kompania tha se nuk u raportuan të lënduar dhe se situata ishte vënë nën kontroll, ndërsa Irani nuk ka komentuar publikisht mbi këtë akuzë.
