Administrata Trump thotë se do t’u paguajë nga 1 mijë dollarë të gjithë emigrantët që janë futur ilegalisht në SHBA dhe që janë kthyer në mënyrë vullnetare.
Departamenti i Sigurisë Kombëtare tha në një njoftim për shtyp të hënën se po paguan gjithashtu për ndihmë udhëtimi dhe se ata njerëz që përdorin një aplikacion të quajtur CBP Home për t’i thënë qeverisë se planifikojnë të kthehen në shtëpi, do të “largohen nga lista e primare” për ndalim dhe largim nga autoritetet e imigracionit.
“Nëse jeni këtu në mënyrë të paligjshme, vetë-deportimi është mënyra më e mirë, më e sigurt dhe më me kosto efektive për t’u larguar nga Shtetet e Bashkuara për të shmangur arrestimin. DHS tani po u ofron të huajve të paligjshëm ndihmë financiare për udhëtim dhe një pagesë për t’u kthyer në vendin e tyre përmes aplikacionit CBP Home”, tha Sekretarja, Kristi Noem.
Presidenti Donald Trump e ka bërë zbatimin e ligjit për imigracionin dhe deportimin masiv të emigrantëve në SHBA që janë në mënyrë të paligjshme një pjesë qendrore të fushatës së tij, por kjo është një përpjekje e kushtueshme dhe që kërkon shumë burime, transmeton Telegrafi.
Ndërsa administrata republikane po i bën presion Kongresit për një rritje masive të burimeve për departamentin e Imigracionit dhe Doganave përgjegjës për largimin e njerëzve nga vendi, ajo gjithashtu po i shtyn njerëzit që ndodhen ilegalisht në vend të “vetë-deportohen”.
