Vaksina antiCOVID-19 e prodhuar nga firma gjermane BioNTech dhe gjiganti farmaceutik amerikan Pfizer është shumë efikase midis adoleshentëve dhe fëmijëve, sipas një rezultati të botuar sot nga vetë kompanitë.
“Vaksina tregoi efikasitet 100 % dhe një përgjigje të fuqishme të antitrupave midis fëmijëve 12-15 vjeç”, thanë kompanitë në një deklaratë të përbashkët.
Rezultatet, që ende nuk janë shqyrtuar nga ekspertët ose botuar në një revistë shkencore, përfshinin 2.260 fëmijë.
“Efektet anësore në grup-moshën më të re ishin të krahasueshme me ato në grup-moshën 16-25 vjeç”, tha një zëdhënës.
Për grup-moshën e vjetër këto përfshinin: dhimbje në vendin e injektimit, lodhje dhe dhimbje koke.
Të dy firmat thanë se tani do të kërkonin autorizimin e përdorimit urgjent për vaksinën midis të rinjve në SHBA dhe BE, duke shpresuar të fillojnë vaksinimet para fillimit të vitit të ri shkollor.
BioNTech dhe Pfizer tashmë kanë filluar provat për grup-moshën 6 muaj deri në 11-vjeç.
Aktualisht, në BE, vaksina është e autorizuar vetëm për personat mbi 16-vjeç.
