Në rajonin malor të Bullgarisë perëndimore, gjashtë persona u gjetën të vdekur në një seri ngjarjesh që ngjallin dyshime për vrasje dhe vetëvrasje. Autoritetet njoftuan se në një zonë të thellë të Maleve Ballkanike (Stara Planina), në një minibus të parkuar, u zbuluan trupat e tre personave, njëri prej tyre 15 vjeç.
Hetuesit besojnë se këto vdekje lidhen me tre trupa të tjerë të gjetur gjashtë ditë më parë pranë një kabine të djegur.
Pamjet e kamerave të sigurisë tregojnë dy grupe që përshëndeten në kabinë, ndërsa tre persona të mbetur shihen më pas duke i vënë flakën objektit. Kryeprokurori i Përkohshëm Borislav Sarafov deklaroi se rasti përmban detaje edhe më tronditëse se seriali kult Twin Peaks.
Prokurorët po hetojnë pistat e vrasje–vetëvrasjes ose vetëvrasjes kolektive. Ngjarja ka shkaktuar reagime të forta në opinionin publik.
Tre viktimat e para (45, 49 dhe 51 vjeç) u gjetën më 2 shkurt pranë kabinës së djegur. Prokuroria e Apelit në Sofje bëri të ditur se ata ishin qëlluar me armë zjarri nga afër dhe pa shenja përleshjeje. Pranë Qafës Petrohan u sekuestruan dy pistoleta dhe një pushkë.
Mes viktimave edhe një i mitur
Gjashtë ditë më vonë, pranë Malit Okolçishta, në një karavan u gjetën dy burra dhe një 15-vjeçar. Policia konfirmoi lidhjen me rastin Petrohan. Raportet e autopsisë sugjerojnë dy vrasje dhe një vetëvrasje.
Autoritetet njoftuan se shumica e viktimave ishin anëtarë të një OJQ-je për mbrojtjen e natyrës. Hetimet po vazhdojnë në disa drejtime.
