Të paktën 20 ushtarë izraelitë janë vrarë në luftimet brenda Rripit të Gazës që nga e marta
Shefi i shtabit të ushtrisë izraelite, Herzi Halevi, tha sot se forcat izraelite po paguajnë një “çmim të rëndë dhe të dhimbshëm” gjatë luftës së Gazës, transmeton Anadolu.
Të paktën 20 ushtarë izraelitë janë vrarë në luftimet brenda Rripit të Gazës që nga e marta.
“Lufta ka një çmim të rëndë dhe të dhimbshëm, por është e nevojshme”, tha Halevi në një mesazh drejtuar forcave izraelite.
“Jemi në mes të një lufte. Do të jetë një luftë e gjatë dhe ne do të luftojmë deri në fund. Ne jemi proaktivë dhe po luftojmë kundër armikut në territorin e tyre”, tha ai.
“Po përparojmë në fazat e luftës dhe po operojmë në terren brenda territorit të armikut, të mbështetur nga zjarri i saktë dhe i rëndë. Aktiviteti do të vazhdojë dhe do të intensifikohet sipas fazave të luftës dhe objektivave të saj, të përcaktuara nga qeveria izraelite”, shtoi Halevi.
Shefi i ushtrisë tha se forcat izraelite i shkaktuan humbje të mëdha Hamasit dhe dëmtuan infrastrukturën e tij.
“Ne do të vazhdojmë të shtyjmë pa u lodhur dhe të përfitojmë nga çdo mundësi për të sjellë pengjet në shtëpi, përmes përpjekjeve të rrezikshme të dukshme dhe të fshehta, siç kemi bërë tashmë”, shtoi ai.
Këtë javë, ushtria izraelite ka zgjeruar sulmet e saj ajrore dhe tokësore në Rripin e Gazës, i cili ka qenë nën sulme të pamëshirshme ajrore që nga operacioni ndërkufitar nga Hamasi më 7 tetor.
Rreth 10.600 njerëz janë vrarë në konflikt, duke përfshirë 9.061 palestinezë dhe 1.538 izraelitë.
Përveç numrit të madh të viktimave dhe shpërnguljeve, furnizimet bazë po mbarojnë për 2,3 milionë banorët në Gaza për shkak të rrethimit izraelit.
